गर्भाशय वाचवण्यावर स्त्रीरोगतज्ज्ञांचा भर
स्त्रीरोगतज्ज्ञांची विशेष कार्यशाळा

सकाळ वृत्तसेवा
मुंबई, ता. १० : महिलांचे गर्भाशय वाचवण्याची जबाबदारी देशभरातील स्त्रीरोगतज्ज्ञांनी उचलली आहे. यासंदर्भात वेळोवेळी कार्यशाळा आयोजित करण्यात येत आहेत. या कार्यशाळेच्या माध्यमातून गर्भाशयाचे संरक्षण कसे करता येईल? यासंबंधित स्त्रीरोगतज्ज्ञांकडून युक्त्या शिकवल्या जात आहेत. सोबतच स्त्रीरोगतज्ज्ञांच्या मदतीने महिलांना गर्भाशयाबाबत जागरूकही केले जात आहे.

गर्भाशय सुरक्षित उपक्रमांतर्गत आयोजित ७५ व्या कार्यशाळेचा शनिवारी (ता. ६) मुंबईत समारोप झाला. ही कार्यशाळा फॉग्सी आणि मॉग्सी या स्त्रीरोगतज्ज्ञांची संघटना यांच्या संयुक्त विद्यमाने आयोजित करण्यात आली होती. या कार्यशाळेत विविध स्त्रीरोगतज्ज्ञांनी आपापले अनुभव एकमेकांना सांगितले आणि अनेक सूचनाही केल्या. कामा रुग्णालयाचे अधीक्षक व स्त्रीरोगतज्ज्ञ डॉ. तुषार पालवे म्हणाले की, ‘केंद्रीय आरोग्य व कुटुंब कल्याण विभागाने गर्भाशयाच्या शस्त्रक्रिया कमी करण्याच्या सूचना दिल्या होत्या. त्या अंतर्गत गर्भाशयाची शस्त्रक्रिया करून ते सुरक्षित ठेवण्यासाठी प्रयत्न केले जात आहेत. त्यामुळेच, या कार्यशाळेचे आयोजन करण्यात आले होते. यामध्ये स्त्रीरोगतज्ज्ञांनी शस्त्रक्रियेपेक्षा गर्भाशयाशी संबंधित आजारांवर औषधोपचार करण्यावर भर देण्यास सांगितले आहे.’

..
गर्भाशय काढण्याचे सर्वात अधिक प्रमाण आंध्र प्रदेशात
राष्ट्रीय कौटुंबिक आरोग्य सर्वेक्षणनुसार भारतात १५ ते ४९ वयोगटातील ३.३ टक्के भारतीय महिलांनी गर्भाशय काढून टाकण्याची शस्त्रक्रिया (हिस्टेरेक्टोमी) केली होती. गर्भाशय काढण्याचे सर्वात अधिक प्रमाण आंध्र प्रदेश ८.७ टक्के आणि तेलंगणा ८.२ टक्के इतके दिसून आले. त्याखालोखाल बिहार ६ टक्के आणि गुजरात ४ टक्के आढळून आले. ईशान्येकडील प्रदेशात १.२ टक्के सर्वात कमी प्रमाण होते, अशी माहिती फेडरेशन ऑफ ऑब्स्टेट्रिक अँड गायनॅकॉलॉजिकल सोसायटी ऑफ इंडियाचे अध्यक्ष डॉ. जयदीप टांक यांनी दिली.