क्रेनवरील बॉयलर कोसळून
दोन कामगारांचा मृत्यू
भिवंडी, ता. १० (बातमीदार) : डाईंग कंपनीतील बॉयलर क्रेनच्या साह्याने उचलत असताना अचानक क्रेनचा पट्टा तुटल्याने बॉयलर अंगावर पडून दोघा कामगारांचा जागीच मृत्यू झाल्याची घटना बुधवारी सरवली एमआयडीसी येथे घडली. बाळाराम चौधरी (५५) आणि पांडुरंग अबा पाटील (६५) अशी मृतांची नावे आहेत. सरवली एमआयडीसी येथे रौनक डाईंग लिमिटेड कंपनीत वॉटर प्री हिटर बॉयलर बसवण्याचे काम सुरू होते. हा बॉयलर क्रेनद्वारे उचलून नेताना अचानक क्रेनचा पट्टा तुटून बॉयलर मजुरांच्या अंगावर पडला. दोन्ही मृतदेह शवविच्छेदनासाठी भिवंडीतील सरकारी उपजिल्हा रुग्णालयात पाठवण्यात आले असून कोनगाव पोलिस ठाण्यात गुन्हा दाखल करण्याची प्रक्रिया सुरू आहे.