तिसऱ्या मजल्यावरून पडून बालिकेचा मृत्यू
मुंबई, ता. १० : इमारतीच्या तिसऱ्या मजल्यावरून पडून नऊ वर्षांच्या बालिकेचा मृत्यू झाल्याची घटना कांदिवलीच्या डहाणूकर वाडीतील स्टील स्टोन इमारतीत घडली. आशिया विश्वकर्मा असे या बालिकेचे नाव असून याप्रकरणी कांदिवली पोलिसांनी अपघाती मृत्यूची नोंद करत तपास सुरू केला आहे. पोलिसांनी दिलेल्या माहितीनुसार मंगळवारी (ता. ९) रात्री ही बालिका घरी खेळत होती. खेळता खेळता ती खिडकीजवळ आली. त्याच वेळेस खिडकीचे ग्रिल उघडले गेले आणि तोल गेल्याने ती खाली पडली. जखमी अवस्थेत तिला रुग्णालयात दाखल करण्यात आले. अतिदक्षता विभागात तिच्यावर उपचार सुरू होते; मात्र पहाटे तिची मृत्यूशी झुंज संपली.