मिहीर शहाकडून अपघाताची कबुली
अपघात झाला तेव्हा मीच गाडी चालवत होतो, अशी कबुली मिहीर शहा याने बुधवारी रात्री वरळी पोलिसांकडे दिली. सुरुवातीला जुहू येथील बारमध्ये दारू प्यायल्याचे नाकारणाऱ्या मिहीरने ती बाबही कबूल केल्याची माहिती विश्वसनीय सूत्रांकडून मिळते. दरम्यान, नव्या कायद्यानुसार पोलिसांनी मिहीरसह या प्रकरणातील सर्वांचे जबाब ऑडिओ, व्हिडीओ रेकॉर्ड केले. मात्र, मिहीर अपघात घडला तेव्हा दारूच्या नशेत चालवत होता, ही बाब न्यायालयात सिद्ध करण्याकरिता पोलिसांना वैद्यकीय चाचणीव्यतिरिक्त अन्य पुराव्यांवर अवलंबून राहावे लागणार आहे. दोन दिवसांनी अटक झालेल्या मिहीरच्या रक्तचाचणीतून तो घटना घडली तेव्हा दारूच्या नशेत होता, ही बाब स्पष्ट होणे कठीण असल्याचे सूत्रांनी सांगितले. याशिवाय अपघातानंतर घाबरून पळून गेलो, असेही त्याने आपल्या कबुली जबाबात सांगितले आहे.