वाशी, ता. १५ (बातमीदार)ः नवी मुंबईच्या विविध नोडमध्ये निवासी, बंगला, निवासी तथा वाणिज्यिक, सेवा उद्योग आणि स्टार हॉटेल वापराकरिता ४८ भूखंडांसह सिडकोच्या गृहनिर्माण संकुलातील २१८ दुकानांच्या विक्रीची योजना सादर करण्यात आली आहे. या योजनेतील दुकानांची ऑनलाईन नोंदणी मंगळवारी (ता. १६) सुरू होणार आहे.
सिडकोतर्फे नवी मुंबईच्या घणसोली, नेरूळ, सीबीडी बेलापूर, खारघर, कोपरखैरणे, कळंबोली, पनवेल (पू.) आणि पनवेल (प.) नोडमधील निवासी, बंगला, निवासी तथा वाणिज्यिक, वाणिज्यिक, सेवा उद्योग आणि स्टार हॉटेल वापराकरिताचे ४८ भूखंड ई-निविदा तथा ई-लिलाव प्रक्रियेद्वारे विक्री होणार आहेत. ई-निविदा तथा ई-लिलाव प्रक्रियेकरिता https://eauction.cidcoindia.com/ या संकेतस्थळावर ८ ते २३ जुलैदरम्यान नोंदणी करता येणार आहे, तर योजनेचा निकाल २५ जुलैला जाहीर होणार आहे, तसेच सिडकोच्या स्वप्नपूर्ती गृहसंकुलासह तळोजा, कळंबोली, घणसोली, खारघर आणि द्रोणागिरी नोडमधील गृहसंकुलांतील २१८ दुकाने ई-निविदा तथा ई-लिलाव प्रक्रियेद्वारे विक्रीकरिता उपलब्ध केली आहेत. ई-निविदा तथा ई-लिलाव प्रक्रियेकरिता https://eauction.cidcoindia.com/ हे संकेतस्थळ उपलब्ध करून देण्यात आले आहे. योजनेच्या ऑनलाईन नोंदणीला मंगळवार १६ जुलैपासून सुरुवात होणार आहे. योजनेचा निकाल २० ऑगस्ट रोजी जाहीर करण्यात येणार आहे.
--------------------------------
सिडकोतर्फे नेहमीच शहरातील बांधकाम क्षेत्राला आणि वाणिज्यिक उपक्रमांना चालना देण्यासाठी भूखंड, दुकाने आणि वाणिज्यिक जागांच्या विक्रीच्या योजना राबवण्यात येतात. या योजनांमुळे नवी मुंबईची अर्थव्यवस्था अधिक बळकट होण्यास मदत होत आहे, तसेच दुकान विक्रीच्या योजनेतून बांधकाम व्यावसायिक, उद्योजक, लघु व मध्यम व्यावसायिक या घटकांनाही व्यवसाय वाढीची उत्तम संधी आहे.
-विजय सिंघल (उपाध्यक्ष तथा व्यवस्थापकीय संचालक, सिडको)