मुंबई : कुष्ठरुग्णांचे पुनर्वसन, नोकरीत संधी तसेच त्यांना शासकीय योजनांचा लाभ मिळवून देण्यासाठी केंद्र व राज्य सरकारकडून विविध योजना राबवण्यात येत आहेत. या योजनांचा वर्षभरात राज्यातील १०,७८५ कुष्ठरुग्णांनी लाभ घेतला आहे. राज्यातील कुष्ठरुग्णांना शासकीय योजनांचा लाभ मिळणे सुलभ व्हावे, यासाठी राज्याच्या सार्वजनिक आरोग्य विभागाचे अपर मुख्य सचिव मिलिंद म्हैसकर यांच्या अध्यक्षतेखाली राज्यस्तरीय समितीची स्थापना करण्यात आली आहे. या समितीची राज्याचे आरोग्य सेवा आयुक्त व राष्ट्रीय आरोग्य अभियानाचे संचालक अमागोथू नायक यांच्या प्रमुख उपस्थितीत मुंबईत बैठक पार पडली. यावेळी संजय गांधी निराधार अनुदान योजना, इंदिरा आवास योजना, महाराष्ट्र राज्य अपंग वित्त व आर्थिक विकास महामंडळ, बँक लोन, अपंग व्यक्तीसाठी बीज भांडवल, आर्थिक सहाय्य व स्वयंरोजगार आदी शासकीय योजनांच्या माध्यमातून कुष्ठरुग्णांचे पुनर्वसन योजनांचा १० हजार ७८५ कुष्ठरुग्णांनी लाभ घेतला.