सकाळ वृत्तसेवा
मुंबई, ता. १५ : अंधेरी पश्चिम येथील ‘बसेरा’ एसआरए सहकारी गृहनिर्माण संस्थेचा वीस वर्षांपासून रखडलेला गृहप्रकल्प लवकरच मार्गी लागणार आहे. २००३ मधील झोपड्यांच्या सर्वेक्षणानुसार बनवलेले परिशिष्ट-२ मध्ये त्रुटी रद्द करून नवीन बायोमेट्रिक सर्वेक्षणानुसार परिशिष्ट-२ तयार करून हा प्रकल्प मार्ग लावण्याचे निर्देश राज्य सरकारने दिले आहेत. त्यामुळे मूळ रहिवाशांना दिलासा मिळाला आहे.
बसेरा सहकारी गृहनिर्माण संस्थेचे परिशिष्ट-२ बनवताना मोठ्या प्रमाणात अनियमितता झाली होती. परिशिष्टातील झोपडीधारक आणि प्रकल्पस्थळी राहणाऱ्या झोपडीधारकांमध्ये मोठ्या प्रमाणात तफावत होती. त्यामुळे बोगस मंडळी मोठ्या संख्येने असल्याने जुन्या परिशिष्टानुसार प्रकल्प राबवण्याला राज्य सरकारने परवानगी नाकारली आहे, तसेच नव्याने परिशिष्ट तयार करून प्रकल्प मार्गी लावण्याचे निर्देश दिले आहेत. त्यामुळे प्रकल्पाला चालना मिळणार आहे.
------------------------------
विधानसभेतही चर्चा
बसेरा एसआरए सहकारी गृहनिर्माण संस्थेच्या पुनर्विकासाच्या अनुषंगाने परिशिष्ट-२ तयार करून ७६६ पात्र झोपडपट्टीधारकांची यादी विकसकाने सादर केली होती, मात्र स्थानिकांनी विरोध केल्याने ही योजना रखडली होती, तसेच २०१९ मध्ये विकसकाने चुकीच्या पद्धतीने परिशिष्ट-२ कसे बनवले होते, याबाबत विधानसभेतही आमदार अमित साटम यांनी प्रश्न मांडला होता.