धार्मिक भावना दुखावणाऱ्याला अटक
भिवंडी, ता. २७ (बातमीदार) : शहरात एका १९ वर्षीय तरुणाने एका समुदायाच्या धार्मिक भावना दुखावणारा मजकूर इंस्टाग्रामवर टाकल्याने नारपोली पोलिसांनी त्याच्याविरोधात गुन्हा दाखल केला आहे. श्रेयस लबडे असे आरोपीचे नाव असून त्याला पोलिसांनी अटक केली आहे. पोलिसांनी दिलेल्या माहितीनुसार, शनिवारी (ता. २४) दुपारी तीन वाजता श्रेयसने त्याच्या इंस्टाग्राम आयडीवर एका विशिष्ट धर्मिक समुदायाच्या दैवताच्या विरोधात वादग्रस्त आणि प्रक्षोभकपणे मजकूर अपलोड केला. त्यामुळे शहरात कायदा व सुव्यवस्थेचा प्रश्न निर्माण करण्याचा प्रयत्न केल्याप्रकरणी श्रेयसच्या विरोधात तक्रार प्राप्त झाल्याने सोमवारी (ता. २६) नारपोली पोलिस ठाण्यात गुन्हा दाखल करून त्यास अटक केली आहे. पुढील तपास पोलिस निरीक्षक प्रमोद कुंभार करीत आहेत.