नायजेरियन महिलेचा पोलिसांच्या ताब्यातून पळून जाण्याचा प्रयत्न
अमली पदार्थाच्या तस्करी प्रकरणात अटक; पंचनामा सुरू असताना काढला पळ
नवी मुंबई, ता. २७ (वार्ताहर) : तब्बल ४३ लाख रुपये किमतीच्या कोकेनसह अटक करण्यात आलेल्या एका नायजेरियन महिलेने तिच्या घराचा पंचनामा करताना तिसऱ्या मजल्यावरून खिडकीद्वारे पाइपने खाली उतरून पळून जाण्याचा प्रयत्न केल्याची घटना सोमवारी दुपारी उलवेमध्ये घडली, मात्र पोलिसांनी वेळीच या महिलेला पुन्हा जेरबंद केले.

अलिशा केम (वय २५) असे आरोपी महिलेचे नाव असून पोलिसांनी या महिलेविरोधात आणखी एक गुन्हा दाखल केला आहे. अलिशा ही नायजेरियन देशातील असून सध्या ती उलवे सेक्टर-१७ मधील सीवूड्स हार्मनी या इमारतीत तिसऱ्या मजल्यावर राहण्यास आहे. तिला शनिवारी (ता. २४) सायंकाळी अमली पदार्थ विक्री करण्याच्या प्रयत्नात असताना न्हावा शेवा पोलिसांनी तिला एका महिलेच्या मदतीने पकडले होते. त्या वेळी अलिशाकडे तब्बल ४३ लाख रुपये किमतीचे कोकेन आढळून आले. पोलिसांनी अमली पदार्थ जप्त करत तिला अटक केली होती.
न्यायालयाकडून अलिशाला पोलिस कोठडी मिळाल्यानंतर पोलिस तपासासाठी सोमवारी (ता. २६) दुपारी चार वाजण्याच्या सुमारास तिला ती राहत असलेल्या उलवे सेक्टर-१७ मधील घरी घेऊन गेले होते. या वेळी घराचा पंचनामा सुरू असताना अलिशाने महिला पोलिसांच्या हाताला हिसका देत घरातील किचनमध्ये पळ काढला. त्यानंतर तिने खिडकीवाटे बाहेर पडून गॅलरीच्या पाइपच्या मदतीने पहिला मजल्यावरून खाली उडी मारून पळून जाण्याचा प्रयत्न केला, मात्र पोलिसांनी प्रसंगावधान दाखवत तिला तत्काळ जेरबंद केले. अलिशाने पोलिसांच्या ताब्यातून पळून जाण्याचा प्रयत्न केल्याने तिच्याविरोधात न्हावा शेवा पोलिसांनी आणखी एक गुन्हा दाखल केला आहे.