विरार, ता. ३ (बातमीदार) : निवडणुकीच्या दैनंदिन-कंत्राटी तत्त्वावर नेमलेल्या कर्मचारी वर्गाला अतिकालिक भत्ता देय नाही, असे राज्याच्या निवडणूक अधिकाऱ्यांनी म्हटले आहे. परिणामी वसई-विरार महापालिका कर्मचारी निवडणूक भत्त्यापासून वंचित आहेत. त्यामुळे महापालिका कार्यालयातील कंत्राटी-ठेका कर्मचाऱ्यांत नाराजी आहे. त्यांची अतिकालिक भत्त्याची मागणी असून, ही रक्कम न मिळाल्यास विधानसभा निवडणुकीचे कोणतेही निवडणूक काम न करण्याचा पवित्रा या कर्मचाऱ्यांनी घेतला आहे.

विधानसभा निवडणुकीसाठी वसई-विरार महापालिकेच्या कंत्राटी-ठेका कर्मचाऱ्यांची बोईसर, नालासोपारा आणि वसई मतदारसंघाकरिता नियुक्ती करावी लागणार आहे. त्यामुळे ही गरज ओळखून या कामासाठीचा अतिकालिक भत्ता या कर्मचाऱ्यांना मिळावा, अशी विनंती प्रातांधिकारी तथा निवडणूक अधिकारी शेखर घाडगे यांनी पालघर जिल्हाधिकारी व जिल्हा निवडणूक अधिकाऱ्यांना केली आहे. वसई तालुक्यात तीन विधानसभा मतदारसंघ येतात. यातील बोईसर मतदारसंघातील काही भागांत १८६ मतदान केंद्रे, नालासोपारा क्षेत्रात ५११ आणि वसई क्षेत्रात ३४८ मतदान केंद्रे येतात. या निवडणुकीच्या कामकाजाकरिता इतर शासकीय कार्यालयांतील कर्मचारी कमी प्रमाणात उपलब्ध असल्याने मोठ्या प्रमाणात मदतीची आवश्यकता असल्याने महापालिकेतील कंत्राटी-ठेका कर्मचाऱ्यांची सेवा अधिग्रहीत करण्यात आलेली होती. त्यानुसार १३२ नालासोपारा मतदारसंघात १३४ आणि वसई मतदारसंघांत ८६ कंत्राटी कर्मचाऱ्यांच्या नेमणुका करण्यात आल्या होत्या. त्यामुळे या कर्मचाऱ्यांनी अतिकालिक भत्ता मिळावी, अशी मागणी लावून धरली आहे.