भरधाव रिक्षाची झाडाला धडक
चार महिलांसह रिक्षाचालक जखमी
नवी मुंबई, ता. ३० (वार्ताहर) : जासई येथून एनआरआय वसाहतीत जाणाऱ्या रिक्षावरील चालकाचे नियंत्रण सुटल्याने ही रिक्षा रस्त्यालगतच्या झाडावर धडकल्‍याची घटना घडली. या अपघातात रिक्षामधील चार महिला व रिक्षाचालक असे पाच जण गंभीररीत्या जखमी झाल्याची घटना सोमवारी सकाळी एनआरआय वसाहतीलगत घडली. एनआरआय पोलिसांनी या अपघाताला जबाबदार असलेल्या रिक्षाचालकावर गुन्हा दाखल केला आहे.
अनुसया लिंबोळी (वय ४५), गंगा येरकर (वय ४६), सुलोचना कांबळे (वय ४०), नंदा येरकर (वय ४६) तसेच रिक्षाचालक स्वामी स्वरनार (वय ४५) असे या अपघातात जखमींची नावे आहेत. या अपघातातील चारही महिला उरणमधील जासई भागात राहण्यास असून त्या सीवूड्स येथील एनआरआय वसाहतीत घरकाम करतात. सोमवारी सकाळी आठ वाजण्याच्या सुमारास या चारही महिला जासई येथून स्वामी स्वरनार याच्या रिक्षामधून एनआरआय वसाहतीत येत होत्या. यावेळी तीन महिला रिक्षात पाठीमागे बसल्या होत्या. तर, चौथी महिला रिक्षाचालकाच्या बाजूला बसली होती. ही रिक्षा किल्ला जंक्शन येथून पामबीचलगतच्या सेवा रस्त्याने एनआरआय वसाहतीच्या दिशेने जात असताना दिल्ली पब्लिक स्कूलजवळ चालकाचा रिक्षावरील ताबा सुटल्याने ही रिक्षा रस्त्यालगतच्या झाडावर जोरदार धडकली. या अपघातात रिक्षामधील चारही महिला व रिक्षाचालक गंभीर जखमी झाले. त्यामुळे त्या सर्वांना नेरूळमधील डी. वाय. पाटील हॉस्पिटलमध्ये दाखल करण्यात आले. या अपघातात रिक्षाचालकाने भरधाव वेगात निष्काळजीपणे रिक्षा चालवून नेल्यामुळे हा अपघात झाल्याचे आढळून आले आहे. त्यानुसार एनआरआय पोलिसांनी रिक्षाचालक स्वामी स्वरनार याच्याविरोधात गुन्हा दाखल केला आहे.