केंद्रीय गृहमंत्री अमित शहा आज नवी मुंबईत

नवी मुंबई, ता. ३० : भाजपचे ज्येष्ठ नेते, केंद्रीय गृहमंत्री अमित शहा हे उद्या  मंगळवारी (ता. १) मुंबई आणि कोकण विभागाच्या  दौऱ्यावर येत आहेत. यावेळी मुंबई आणि कोकणातील विधानसभा निवडणुकीसाठीच्या बैठका घेत ते कार्यकर्ता आणि पदाधिकारी यांना करतील. अमित शहा यांनी अलीकडेच विधानसभा निवडणुकीच्या दृष्टीने विदर्भ, मराठवाडा, पश्चिम महाराष्ट्र आणि उत्तर महाराष्ट्रात भाजपच्या बैठका घेतल्या होत्या. आता  मुंबई आणि कोकण विभागाच्या बैठका  होणार आहेत. कोकण तसेच ठाणे, पालघर जिल्ह्यांकरिता बैठक घेण्यासाठी गृहमंत्री अमित शहा नवी मुंबईत येत आहेत. कोकण विभागाची बैठक वाशी येथील सिडको प्रदर्शनी सभागृहात दुपारी चार वाजता आयोजित करण्यात आली आहे.  या बैठकीला उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे,  प्रदेश पदाधिकारी,  कोकण विभागातील भाजपचे लोकप्रतिनिधी, पदाधिकारी उपस्थित राहणार आहेत. केंद्रीय गृहमंत्री अमित शहा यांच्या स्वागताची जोरदार तयारी नवी मुंबईत करण्यात आली आहे.  वरिष्ठ नेतृत्वाच्या मार्गदर्शनाखाली भाजपचे नवी मुंबई जिल्हाध्यक्ष संदीप नाईक आणि कोकण विभागातील ज्येष्ठ पदाधिकारी  बैठकीच्या नियोजनाची  जबाबदारी सांभाळत आहेत.