जव्हार, ता. ३ (बातमीदार) : आगामी काळात होऊ घातलेल्या विधानसभेच्या निवडणुकीत विक्रमगडसाठी महायुतीतून जव्हारला नेतृत्व करण्याची संधी मिळावी, अशी मागणी तालुक्यातील शिंदे गटाच्या शिवसैनिकांनी केली आहे. दरम्यान, तालुक्यातील खंबीर व जबाबदार नेतृत्व; तसेच मुख्यमंत्री शिंदे यांचे निकटवर्तीय विनायक राऊत यांना प्रथम पसंती देऊन त्यांच्या गळ्यात आमदारकीची माळ घातली जावी, अशी मागणी जोर धरत आहे.
काही वर्षांपासून जव्हार तालुक्यातील आमदार झाला नसल्याने विधानसभेचे प्रतिनिधित्व जव्हारला करता आले नाही. त्यामुळे तोंडावर आलेल्या महाराष्ट्राच्या विधानसभेच्या निवडणुकीत विक्रमगडसाठी स्थानिक उमेदवार मिळाल्यास शिवसैनिक जोमाने त्या उमेदवाराचा प्रचार करून निवडून आणतील, अशी आशा जव्हारचे शिवसैनिक व्यक्त करत आहेत. जव्हार तालुका शिवसेना विक्रमगड विधानसभेसाठी आग्रही असून येणाऱ्या निवडणुकीत विक्रमगड विधानसभेचा उमेदवार हा पक्षाचाच असावा, अशी मागणी जोर धरत आहे. दरम्यान, तालुकाप्रमुख विनायक राऊत अथवा त्यांचे चिरंजीव कल्पेश राऊत यांच्या नावाच्या उमेदवारीची विक्रमगड मतदारसंघात जोरदार चर्चा सुरू आहे.

विक्रमगड विधानसभा जर शिवसेनेला दिली, तर तालुक्यातील शिवसैनिक जोमाने प्रचार करतील. जव्हारच्या आमदाराला प्रथमच विधानसभेत पाठवतील. यामुळे येथील विकासाला चालना मिळेल.
- विनायक राऊत, शिवसेना शिंदे गट तालुकाप्रमुख, जव्हार