पालघर, ता. ५ (बातमीदार) : केळवे परिसरात गेल्या काही दिवसांपासून वारंवार विद्युत ट्रान्स्फॉर्मरवर येणाऱ्या अतिरिक्त भारामुळे नादुरुस्त होण्याचे प्रमाण वाढले आहे. या सर्व बाबी लक्षात घेऊन माजी खासदार राजेंद्र गावित यांनी दांडा खाडी येथे नवीन ट्रान्स्फॉर्मर बसविण्याच्या सूचना केल्या आहेत. या कामासाठी आर्थिक तरतूदही गावित यांनी उपलब्ध करून दिल्याने येत्या काही महिन्यांत हा प्रश्न मार्गी लागेल, असे आश्वासन महावितरणचे अधीक्षक अभियंता दिलीप खानांदे यांनी राजेंद्र गावित आणि केळवेतील व्यावसायिकांना दिले आहे.

केळव्यातील पर्यटन व्यवसायिकांनी माजी खासदार राजेंद्र गावित यांच्या मार्गदर्शनाखाली पालघर येथील महावितरण कंपनीच्या कार्यालयात अधिकारी आणि केळवे पर्यटन व्यावसायिक यांची एकत्र बैठक आयोजित करण्यात आली होती. त्यावेळी खानांदे यांच्याकडे पर्यटक व्यावसायिकांनी आपल्या मागण्या मांडल्या. या वेळी अनेक मागण्या मान्य केल्याचे आश्वासन अधीक्षक अभियंत्यांनी दिले. खासदारांनी दांडा खाडी येथे २०० केव्ही क्षमतेच्या नवीन ट्रान्स्फॉर्मर बसविण्याच्या सूचना केल्या व त्याला जिल्हा नियोजन विभागातून आर्थिक तरतूद करून दिली. या बैठकीला महावितरणचे कार्यकारी अभियंता सुनील भारंबे, अधिकारी स्वप्नील घरत, तसेच केळवे बीच पर्यटन उद्योग विकास संघाचे आशीष पाटील, संजय घरत, रोहित राऊत, दिनेश सावे, हर्षल पाटील आदी मान्यवर उपस्थित होते.