सकाळ वृत्तसेवा
नवी मुंबई, ता. ४ : नवी मुंबई महापालिकेतर्फे उभारण्यात येत असलेल्या मल्टिस्पेशालिटी रुग्णालयाच्या उभारणीवर न्यायालयाने स्थगिती दिली आहे. नवी मुंबईच्या नागरिकांच्या आरोग्य सुविधा उपलब्ध करून देताना स्वकियांकडूनच विरोध केला जात आहे. अशा घटकांविरोधात उतरून आंदोलन करण्याचा इशारा बेलापूरच्या भाजप आमदार मंदा म्हात्रे यांनी दिला आहे.
भविष्यात नवी मुंबईची वाढती लोकसंख्या पाहता नागरिकांना आरोग्याच्या चांगल्या सुविधा उपलब्ध करण्यासाठी मंदा म्हात्रे यांनी शासनाकडून वैद्यकीय महाविद्यालय आणि रुग्णालयाचा प्रकल्प मंजूर केला होता. या प्रकल्पाच्या प्रत्यक्ष उभारणीच्या कामाला वेगाने सुरुवात होणार होती. पालिका प्रशासनाकडे सततच्या पाठपुराव्यानंतर प्रशासकीय स्तरावरील अंदाजे २५ टक्के काम पूर्ण झाले आहे. पहिल्या टप्प्याची निविदा निघाली होती; पण काही समाजविघातक लोकांनी प्रकल्पाविरोधात न्यायालयात धाव घेतल्यामुळे या प्रकल्पाला न्यायालयाने स्थगिती दिली आहे. त्यामुळे गोरगरिबांना मिळणारी आरोग्यसेवेपासून वंचित राहावे लागल्याने न्यायालयीन स्थगिती थांबवून गुरुवारी, १० ऑक्टोबरला सकाळी जनआंदोलन करणार आहे. तसेच, प्रकल्पांमध्ये अडथळे आणणाऱ्यांचा भांडाफोड करणार असल्याचा इशाही म्हात्रे यांनी दिला आहे.