वाशी, ता. ३ (वार्ताहर) : मराठा समाजासह महिलांबद्दल फेसबुकवर आक्षेपार्ह विधान नाशिकमधील एका व्यक्तीने केले आहे. दोन समाजांत तेढ निर्माण करण्यासाठी हा हेतुपुरस्सर प्रयत्न असून सकल मराठा समाजाच्या तक्रारीनंतर सानपाडा येथे दखलपात्र गुन्हा नोंदवण्यात आला आहे.
ओबीसी समाजासाठी आंदोलन करणारे लक्ष्मण हाके यांनी मद्यप्राशन केल्याच्या संशयावरून पुण्यातील मराठा समाजातील तरुणांनी जाब विचारला होता. या घटनेचे पडसाद राज्यभरात उमटत असताना नाशिकमधील श्रावण देवरे याने फेसबुक पोस्टमधून मराठा समाज आणि महिलांबद्दल आक्षेपार्ह लिखाण केले. ही बाब लक्षात आल्यानंतर सकल मराठा समाजाचे नवी मुंबईचे समन्वयक विनोद पोखरकर यांनी सानपाडा पोलिस ठाण्यात निवेदन दिले आहे. या आक्षेपार्ह विधानामुळे मराठा समाजाच्या भावना दुखावल्या आहेत. तसेच, दोन समाजांत तेढ निर्माण करण्याचा हा प्रयत्न असल्याचा आरोप केला आहे. त्यामुळे देवरेविरोधात गुन्हा दाखल करावा, तसेच फेसबुकवरील पोस्ट तत्काळ डिलीट करावी, अशी मागणी केली आहे.