बदलापूर, ता. ३ (बातमीदार)ः विधानसभा निवडणुकीच्या तोंडावर मुरबाड विधानसभा मतदारसंघात बदलापूर शहरातील उमेदवाराचा आढावा घेण्यासाठी आलेल्या पक्ष जिल्हा निरीक्षकांच्या समोरच माजी खासदार कपिल पाटील आणि स्थानिक आमदार किसन कथोरे यांचे समर्थक भिडले. या वादामुळे एकीकडे निरीक्षकांवर बैठक रद्द करण्याची नामुष्की तर ओढावली तर दुसरीकडे भाजपमधील अंतर्गत वादही चव्हाट्यावर आला आहे.
विधानसभा निवडणुकीपूर्वी भाजपच्या प्रदेश कार्यकारिणी मंडळाकडून प्रत्येक मतदारसंघात आढावा बैठका घेतल्या जात आहेत. याच पार्श्वभूमीवर बदलापूर पूर्वेकडील एका खासगी सभागृहात गुरुवारी जिल्हा निरीक्षक गोपाळ शेट्टी यांच्या नेतृत्वात आढावा बैठक झाली. या बैठकीसाठी बदलापूर शहरातील भाजप कार्यकर्ते मोठ्या संख्येने एकत्रित आले होते. यावेळी उमेदवार निश्चितीसाठीच्या निवडणुकीत भाजप मंडळामधील यादीत आमदार किसन कथोरे यांच्या समर्थकांची नावे वगळल्याचे दिसून आले. याच कारणावरून अंबरनाथ तालुका अध्यक्ष राजेश पाटील आणि ठाणे जिल्हा ग्रामीणचे अध्यक्ष मधुकर मोहपे यांच्यात शाब्दिक वादाला सुरुवात झाली. तर, हाणामारीही झाल्याने निरीक्षकांना बैठकच रद्द करावी लागली.
------------------------------------------
पक्षांतर्गतच वादाचा फटका उमेदवाराला
वादावादीच्या वेळी मोहपे यांच्या खासगी सुरक्षा रक्षकाने रिव्हॉल्वर काढल्याने बैठकीत तणावाचे वातावरण निर्माण झाले होते. अखेर, निरीक्षकांनी
नवीन यादी तयार करण्याच्या सूचना दिल्या. त्यानंतरच उमेदवार निश्चितीसाठी पक्षांतर्गत बैठक होणार आहे. त्यामुळे आगामी विधानसभा निवडणुकीत पक्षांतर्गतच वादाचा फटका उमेदवाराला बसण्याची शक्यता वर्तवली जात आहे.