‘महारेरा’च्या नव्या संकेतस्थळामध्ये त्रुटी

सकाळ वृत्तसेवा
मुंबई, ता. ४ : ‘महारेरा’ने नुकत्याच सुरू केलेल्या ‘महाकृती’ या नवीन संकेतस्थळामध्ये काही त्रुटी आढळून आल्या आहेत. त्यामुळे घर खरेदीदार, विकसक, प्रवर्तक, एजंट्स आणि इतर भागधारकांची गैरसोय होत आहे. याची ‘महारेरा’ने गंभीर दखल घेतली असून जुने संकेतस्थळ पुन्हा सुरू करण्याचा निर्णय घेण्यात आला आहे. जुने संकेतस्थळ शनिवार (ता. ५)च्या मध्यरात्रीपासून सुरू होणार आहे. दिवाळी, दसरा या सणासुदीच्या काळात नवीन घरांची नोंदणी करणे, नवीन घर विकत घेणे, विकसकांनी नवीन गृहनिर्माण प्रकल्प सुरू करणे, असे व्यवहार मोठ्या प्रमाणात केले जातात. ही काम करताना सर्व संबंधितांना ‘महाकृती’ संकेतस्थळातील तांत्रिक त्रुटींमळे अडचणींना सामोरे जावे लागत आहे. महारेराचे अध्यक्ष मनोज सौनिक यांनी त्याची दखल घेतली असून गैरसोय टाळण्यासाठी जुने संकेतस्थळ सुरू करण्याच्या सूचना दिल्या आहेत. त्यानुसार जुने संकेतस्थळ ५ ऑक्टोबरच्या मध्यरात्री ११.५९ वाजल्यापासून वापरात येणार आहे. सर्व संबंधितांनी या बदलाची नोंद घ्यावी आणि महारेराला सहकार्य करावे, असे आवाहन महारेराच्या वतीने करण्यात येत आहे.