विरार (बातमीदार) : वसई-विरार महापालिकेने प्रभाग समिती ‘सी’ चंदनसारअंतर्गत विरार पूर्व येथे टोटाळे तलावावर गणेशमूर्ती विसर्जनाची सोय केली होती. या तलावात विसर्जनासाठी पालिकेमार्फत पोहता येत असलेल्या स्वयंसेवकांची नियुक्ती करण्यात आली होती. १८ सप्टेंबर रोजी अमित सतीश मोहिते (वय २४, रा. फुलपाडा) हा विसर्जन करतेवेळी फिट आल्याने पाण्यात बुडाला होता. त्यावेळी त्याला अग्निशमन दलाच्या जवानांनी तत्काळ बाहेर काढून रुग्णालयात दाखल केले; परंतु तोपर्यंत त्याचा मृत्यू झाला होता. या घटनेची दखल घेऊन आमदार क्षितिज ठाकूर यांनी मृताच्या कुटुंबीयांना पालिकेकडून आर्थिक मदत मिळण्यासाठी आयुक्त अनिलकुमार पवार यांना पत्राद्वारे कळविले होते. शुक्रवारी (ता. ४) पालिकेमार्फत आर्थिक मदतीचा पाच लाखांचा धनादेश मृत युवकाच्या कुटुंबीयांना आमदार क्षितिज ठाकूर यांच्या हस्ते देण्यात आला. या वेळी आमदार हितेंद्र ठाकूर, माजी महापौर नारायण मानकर, माजी महापौर प्रवीण शेट्टी, उपायुक्त सदानंद पुरव, सहाय्यक आयुक्त विक्टर डिसोजा, मुख्य अग्निशमन अधिकारी दिलीप पालव आदी उपस्थित होते.