एन विभागात महास्वच्छता अभियान
घाटकोपर, ता. ९ (बातमीदार) ः राष्ट्रपिता महात्मा गांधी यांच्या जयंतीनिमित्त एन विभाग पालिकेच्या वतीने महास्वच्छता अभियान आणि ‘एक पेड माँ के नाम’ या उपक्रमाचा सांगता सोहळा झाला. परिमंडळ सहाचे उपआयुक्त संतोष धोंडे, सहाय्यक आयुक्त गजानन बेल्लाळे यांच्या मार्गदर्शनाखाली घनकचरा व्यवस्थापन विभागाचे सहायक अभियंता सूर्यकांत सातपुते यांच्या वतीने महास्वच्छता अभियान राबविण्यात आले. मातोश्री रमाबाई आंबेडकर नगर व पारशीवाडी जामा मशीद परिसरात स्वच्छता मोहीम घेण्यात आली. या मोहिमेत सहाय्यक आयुक्त गजानन बेल्लाळे यांनी हातात झाडू घेऊन सफाई कर्मचाऱ्यांसोबत मोहिमेत सहभाग घेतला. सफाई कर्मचारी आणि अधिकाऱ्यांचा सहायक आयुक्त गजानन बेल्लाळे यांनी गौरव केला. या मोहिमेत माजी नगरसेवक दीपक हांडे हेदेखील सहभागी झाले होते.
२०२४ यावर्षी अनेक मंडळांनी, तसेच घरगुती गणेशोत्सव साजरा करणाऱ्या कुटुंबांनी पर्यावरणपूरक उत्सव साजरा केल्याबद्दल यंदा अखिल भटवाडी सार्वजनिक उत्सव मंडळाचा सहाय्यक आयुक्त गजानन बेल्लाळे यांनी प्रमाणपत्र देऊन गौरव केला.

पर्यावरण संवर्धनाची शपथ
स्वच्छता पंधरवडानिमित्त आणि राष्ट्रपिता महात्मा गांधी यांच्या जयंतीनिमित्त एन विभागात ‘एक पेड मां के नाम’ या उपक्रमाचा सांगता सोहळा करण्यात आला. या वेळी पश्चिम आणि पूर्वमध्ये मोकळे भूखंड आणि उद्दानात प्रत्येक कर्मचारी आणि अधिकारी यांनी या उपक्रमात सहभाग घेतला. पर्यावरणाच्या दृष्टीने उपयुक्त असणाऱ्या झाडाचे वृक्षारोपण आणि त्यांचे संवर्धन करण्याची या वेळी शपथ घेण्यात आली.