समुदाय आरोग्‍य अधिकाऱ्यांकडे दुर्लक्ष
महिला डॉक्‍टरांचे आंदोलन
मुंबादेवी, ता. ९ (बातमीदार) : एकीकडे सर्वत्र शारदेय नवरात्रीचा उत्‍साह असताना धन्वंतरीच्या रूपात ग्रामीण भागातील उपकेंद्र स्तरावर आरोग्य सेवा देणाऱ्या समुदाय आरोग्य अधिकारीपदावरील महिला डॉक्टरांनी सोमवारी (ता. ७) आझाद मैदानावर आंदोलन केले.
या आंदोलनात पुरुष डॉक्टरांच्या बरोबरीनेच राज्यभरातून आलेल्या महिला डॉक्टरांपैकी डॉ. दर्शना टावरे, डॉ. मयुरी गावडे, डॉ. मीनल मोकल आणि डॉ. कृपाली सोनावले यांनी नवरात्रीचा उपवास करीत आंदोलनात सहभाग घेतला. पेण येथून आलेल्या डॉ. मीनल मोकल म्हणाल्या, आम्ही दुर्गम भागात दिवस-रात्र सेवा देत आहोत. कोरोना काळातही जीव धोक्यात घालून काम केले. आज आम्ही पाच वर्षे सेवा देत असताना अवघ्या २८ हजार ७४० रुपये मासिक मानधनावर राबवले जात आहे. या सेवा देणाऱ्या डॉक्टरांमध्ये महिला डॉक्टरांची संख्या अंदाजे ६० टक्के आहे. नियमित शासकीय सेवेत कार्यरत वैद्यकीय अधिकाऱ्यांच्या धर्तीवर मासिक वेतन मिळावे, अशी मागणी समुदाय आरोग्‍य अधिकाऱ्यांनी राज्‍य सरकारकडे केली आहे.
आमचे सहकारी डॉ. गणेश बाहेती, डॉ. अली कुरेशी, डॉ. गोयल रावते, डॉ. ऋतूजा वानखेडे, डॉ. गणेश शेळके, पल्लवी कदम यांचे सेवाकाळात दुर्दैवाने निधन झाले. यांच्या कुटुंबीयांना सरकारने आर्थिक मदत आणि शासकीय नोकरीत सामावून घ्यावे, अशी मागणी मयुरी गावडे यांनी केली. राज्यभरातील नऊ हजार ५०० डॉक्टरांचे भवितव्य सरकारच्या हाती असल्याने त्यांना तत्काळ न्याय द्यावा, अशी मागणी डॉ. अंकुश मानकर, प्रकाश मोरे, डॉ. अजित पाटील, डॉ. कृपाली सोनावले यांनी या वेळी केली.
पुणे, नगर, सातारा, सांगली, कऱ्हाड, गडचिरोली, भंडारा, रायगड अशा राज्यातील ३० जिल्ह्यांतील ग्रामीण भागातून आलेले समुदाय आरोग्य अधिकारी सहभागी होते.