नवी मुंबई, ता. ९ (वार्ताहर) : एनआरआय सागरी पोलिस ठाण्याचे वरिष्ठ पोलिस निरीक्षक सतीश कदम यांना बेलापूर येथील एका बांधकाम व्यावसायिकाकडून चार लाखांची लाच घेताना लाचलुचपत प्रतिबंधक विभागाच्या मुंबई शाखेने मंगळवारी (ता. ८) रात्री रंगेहाथ पकडले. सतीश कदम यांनी या बांधकाम व्यासायिकाला वेगवेगळ्या गुन्ह्यात अडकवण्याची भीती दाखवून त्याच्याकडे ५० लाख रुपये लाचेची मागणी करून त्याच्याकडून १४ लाख रुपये उकळले होते. या कारवाईनंतर नवी मुंबई पोलिस दलात खळबळ उडाली आहे.
जुलै महिन्यामध्ये बेलापूर येथील शहाबाज गावात इंदिरा निवास इमारत कोसळली होती. या प्रकरणात एनआरआय पोलिसांनी बांधकाम व्यावसायिक महेश कुंभार याच्या विरोधात सदोष मनुष्यवधाचा गुन्हा दाखल केला होता. त्यानंतर वरिष्ठ पोलिस निरीक्षक सतीश कदम यांनी महेश कुंभार याला विविध गुन्ह्यात अडकवून त्याच्यावर गंभीर कलमे लावण्याची धमकी दिली होती, तसेच या प्रकरणातून वाचण्यासाठी कदम यांनी ५० लाख रुपयांची लाच मागितली होती. तडजोडीअंती कुंभार याने १८ लाख रुपये देण्याची तयारी दर्शविल्यानंतर महेश कुंभार यांचा मुलगा अजय कुंभार याने २३ सप्टेंबर रोजी १२ लाख आणि २७ सप्टेंबर रोजी दोन लाख रुपये सतीश कदम यांना दिले होते.
----------
एनआरआय पोलिसांनी कुंभार याच्या विरोधात एका महिलेची फसवणूक केल्याप्रकरणी गुन्हा दाखल केला होता. या गुन्ह्यातसुद्धा सतीश कदम यांनी पाच लाख रुपयांची मागणी केली होती; मात्र कुंभार याच्या मुलाने चार लाख रुपये देण्याची तयारी दर्शवून सतीश कदम यांच्या विरोधात थेट मुंबई येथील लाचलुचपत प्रतिबंधक कार्यालयात तक्रार दाखल केली होती. तक्रारीच्या अनुषंगाने सतीश कदम यांनी लाचेची मागणी केल्याचे निष्पन्न झाल्यानंतर मंगळवारी रात्री पोलिसांनी सापळा लावला होता. रात्री १०.३० वाजण्याच्या सुमारास सतीश कदम यांनी उलवे येथील राहत्या घरी अजय कुंभार याच्याकडून चार लाख रुपयांची लाच स्वीकारल्यांनतर लाचलुचपत पथकाने त्यांना रंगेहाथ पकडले.