एसटीच्या पुरवठादारांची १५० कोटींची देणी प्रलंबित!

सकाळ वृत्तसेवा
मुंबई, ता. ९ : ‘एसटीला सामान व इंधन पुरवणाऱ्या पुरवठादारांची अंदाजे १५० कोटी रुपयांची देणी प्रलंबित असून यापुढे डिझेल व सामानासाठी गाड्या उभ्या राहतील, अशी परिस्थिती निर्माण झाली आहे. त्याचप्रमाणे पीएफ, ग्रॅच्युइटी व एलआयसीसारख्या रकमा न भरणे ही जोखीम आहे. खिळखिळ्या एसटीचा आवाज सरकारला येत नाही का,’ असा सवाल महाराष्ट्र एसटी कर्मचारी काँग्रेसने केला आहे.
महाराष्ट्र एसटी कर्मचारी काँग्रेसचे सरचिटणीस श्रीरंग बरगे म्हणाले, ‘पुरवठादारांची अंदाजे १५० कोटी रुपयांची देणी प्रलंबित असून यापुढे गाड्या उभ्या राहतील, अशी परिस्थिती निर्माण झाली आहे. एसटीमध्ये विविध प्रकारच्या सवलती प्रवाशांना दिल्या जातात. त्याची साधारण ३५० कोटी रुपये इतकी रक्कम दर महिन्याला होत असून सरकारकडून त्याची प्रतिपूर्ती होत नाही. ही रक्कम एसटीला देताना सरकारने कधीच पूर्णपणे दिलेली नाही. सन २३-२४च्या अर्थसंकल्पात तरतूद करण्यात आलेल्या रकमेतील ६१२ कोटी रुपये इतकी रक्कम अजूनही सरकारने दिली नाही. परिणामी, कर्मचाऱ्यांची वेतनातून कपात केलेली रक्कम त्या त्या संस्थांना भरण्यात आलेली नाही. याशिवाय इतरही सर्व देणी प्रलंबित आहेत. यामध्ये भविष्य निर्वाह निधी ७५० कोटी रुपये, उपदान १,०५० कोटी रुपये, एसटी बँक ९० कोटी रुपये, रजा रोखीकरण ६० कोटी रुपये, एलआयसी १० कोटी रुपये, कर्मचाऱ्यांची मेडिकल बिले पाच कोटी रुपये यांचा समावेश आहे.’