परतीच्या पावसाची हजेरी
उकाड्याने त्रासलेल्‍या मुंबईकरांना दिलासा
सकाळ वृत्तसेवा
मुंबई, ता. ९ ः ऑक्टोबर हिट जाणवू लागली असतानाच मुंबईत बुधवारी (ता. ९) परतीच्या पावसाने कमबॅक केले आहे. हलक्या सरींनी मुंबई ओलीचिंब झाली. त्‍यामुळे उकाड्याने त्रासलेल्‍या मुंबईकरांना काहीसा दिलासा मिळाल्‍याचे दिसले.
पावसामुळे मुंबईत गारवा निर्माण झाला आहे. उद्या गुरुवारी (ता. १०) वादळी वाऱ्यासह पाऊस कोसळण्याचा अंदाज वेधशाळेने वर्तवला आहे.
सकाळपासून अधूनमधून ढगाळ वातावरण होते. संध्याकाळी मळभ दाटले होते. संध्याकाळी शहर आणि उपनगरात पावसाच्या हलक्या सरी पडल्या. अचानक दाखल झालेल्‍या पावसामुळे मुंबईकरांची काहीशी तारांबळ उडाली. जवळ छत्री नसल्‍याने अनेकांना भिजतच आपले घर गाठावे लागले, मात्र ऑक्टोबर हिटच्या सुरुवातीला अचानक पडलेल्या पावसाने वातावरणात गारवा निर्माण झाला आहे.
वातावरणातील आर्द्रता वाढल्याने उकाडा वाढला होता. आठवडाभरानंतर परतीच्या पावसाने पुन्हा हजेरी लावली. मुंबई उपनगरातील अनेक भागात ढगांच्या गडगडाटासह पाऊस कोसळला. दुपारी चारच्या सुमारास हलक्या सरी पडल्या. कुलाबा येथे तीन मिलिमीटर, तर सांताक्रूझ येथे आठ मिलिमीटर पावसाची नोंद झाली आहे. सायंकाळपर्यंत मुंबईतील काही भागांमध्ये पावसाची रिपरिप सुरू होती. त्‍यामुळे सायंकाळी गरबा, दांडियासाठी घराबाहेर पडलेल्‍या तरुण-तरुणींचा काहीसा
हिरमोड झाला.