ट्रान्स्फॉर्मरच्या वायरचा शॉक लागून १५ वर्षांच्या मुलाचा मृत्यू
गरबा बघण्यासाठी ट्रान्स्फॉर्मरच्या भिंतीवर चढला आणि जीव गमावून बसला
सकाळ वृत्तसेवा
डोंबिवली, ता. ९ : कल्याण पश्चिम साई चौक खडकपाडा येथे काल रात्री गेली २४ वर्षे चालत असलेला गरबा येथे एका तरुणाला डी.जे.तील विजेच्या वायरचा धक्का लागून त्याचा जागेवर मृत्यू झाल्याची हृदयद्रावक घटना घडली आहे. कमलाकर खंडू नवाळे (वय १५) असे या मयत मुलाचे नाव असून तो दहावीत शिक्षण घेत होता. गरबा सुरू असताना ट्रान्स्फॉर्मरच्या भिंतीवर कमलाकर चढला होता; मात्र खाली उतरत असताना तोल गेल्याने ट्रान्स्फॉर्मरच्या वायरला हात लागल्याने शॉक लागून त्याचा मृत्यू झाल्याची घटना रात्रीच्या सुमारास घडली. याबाबत गरबा आयोजक हे सर्वस्वी जबाबदार असून याप्रकरणी हलगर्जीपणा व मृत्यूस कारणीभूत असल्याचा गुन्हा खडकपाडा पोलिस ठाण्यात दाखल करण्याची प्रक्रिया सुरू असल्याचे पोलिसांनी सांगितले.