आर्थर रोड कारागृहातून पळालेल्‍या आरोपीस अटक
विनयभंगासह पोक्सो कलमांतर्गत गुन्हा दाखल
अंधेरी, ता. २२ (बातमीदार) ः आर्थर रोड कारागृहात नेताना शुक्रवारी पळून गेलेल्या अमोल पांडुरंग शेलार या ३८ वर्षांच्या आरोपीला शनिवारी पहाटे खार दांडा परिसरातून खार पोलिसांच्या एका विशेष पथकाने अटक केली.
अमोल हा त्याच्या आईला भेटण्यासाठी आला होता. या वेळी तिथे आधीच पाळत ठेवलेल्या पोलिसांनी त्याला पकडले. अटकेनंतर त्याला पुढील चौकशीसाठी ना. म जोशी मार्ग पोलिसांकडे सोपविण्यात आल्याचे वरिष्ठ पोलिस निरीक्षक संजीव धुमाळ यांनी सांगितले. अमोलविरुद्ध विनयभंगासह पोक्सोच्या विविध कलमांतर्गत गुन्हा दाखल झाला होता. याच गुन्ह्यांत अटक केल्यानंतर तो सध्या न्यायालयीन कोठडीत आर्थर रोड कारागृहात बंदिस्त होता.
शुक्रवारी त्याला विशेष सत्र न्यायालयात सुनावणीसाठी हजर करण्यात आले होते. सुनावणी संपल्यानंतर त्याला पुन्हा कारागृहात नेण्यात येत होते. या वेळी आर्थर रोड कारागृहाजवळ तो पोलिस पथकाला धक्काबुक्की करून पळून गेला होता. त्यामुळे ना. म जोशी मार्ग पोलिसांनी अमोलविरुद्ध कायदेशीर रखवालीतून पलायन केल्याप्रकरणी गुन्हा दाखल केला होता. शोधमोहीम सुरू असताना अमोल हा त्याच्या आईला भेटण्यासाठी खारदांडा परिसरात शनिवारी पहाटे आला होता. वरिष्ठ पोलिस निरीक्षक संजीव धुमाळ यांच्या पथकातील वैभव काटकर, हनमंत कुंभारे, मनोज वैद्य, भरत काच्चे, दिनेश शिर्के, आनंद निकम, अजीत जाधव यांनी तिथे साध्या वेशात पाळत ठेवून अमोल शेलारला अटक केली. गुन्हा दाखल होताच काही तासांत अमोल पकडला गेला, त्यामुळे त्याला पुढील कारवाईसाठी ना. म जोशी मार्ग पोलिसांकडे सोपविण्यात आले.