कल्याण, ता.२२ (वार्ताहर): कल्याणजवळील मोहने येथे बारावीत शिक्षण घेणाऱ्या मुलाने वडिलांनी सहलीला जाण्यास नकार दिल्याने घरातून पलायन केल्याने शनिवारपासून बेपत्ता आहे. याप्रकरणी खडकपाडा पोलिस स्टेशनमध्ये गुन्हा दाखल आहे.
कल्याणच्या बिर्ला कॉलेजमध्ये इयत्ता बारावीत सुजल जगताप खासगी कोचिंग क्लासेसमध्ये जातो. या क्लासतर्फे एक सहल काढण्यात आली आहे. याची कल्पना मोबाईलवरून सुजलने वडिलांना दिली होती. तसेच सहलीला जाण्याकरिता आग्रह धरला होता. मात्र, वडील शिवनाथ यांनी बारावीचे महत्त्वाचे वर्ष असून अभ्यासात लक्ष घालण्याचे सांगत सहलीला जाण्यास नकार दर्शविला होता. त्यामुळे रागावलेल्या सुजलने शनिवारी रात्रीच घरातूनच पलायन केले. चार दिवसांपासून तो बेपत्ता असल्याने याप्रकरणी खडकपाडा पोलिस स्टेशनमध्ये नोंद करण्यात आली आहे.