Latest Thane News: गतवर्षीप्रमाणे यंदाही दिवाळीनिमित्त मुंबई आणि ठाणेकरांचा आनंद द्विगुणीत करण्यासाठी सुगी ग्रुपतर्फे वसंतोत्सव या प्रतिष्ठित संगीत महोत्सवाचे आयोजन केले आहे. त्यामध्ये द राहुल देशपांडे कलेक्टिव्ह शास्त्रीय संगीत गायक राहुल देशपांडे यांची मैफल  बोरिवली, ठाणे आणि डोंबिवली येथे २९ आणि ३०ला रंगणार आहे.

राहुल देशपांडे यांच्या मंत्रमुग्ध करणाऱ्या आणि उंची सांगीतिक अनुभव देणाऱ्या या संगीत मैफलीमुळे यंदाची दिवाळी अविस्मरणीय ठरणार आहे. ‘वसंतोत्सव’अंतर्गत २९ ऑक्टोबरला  रात्री नऊ वाजता ‘द राहुल देशपांडे कलेक्शन’चे दिवाळी विशेष आवृत्तीतील पहिले पुष्प डोंबिवली येथील सावित्रीबाई फुले नाट्यगृह येथे गुंफले जाणार आहे. त्यानंतर ३० ऑक्टोबरला  सकाळी सात वाजता ठाणे येथील काशिनाथ घाणेकर नाट्यगृह येथे हा कार्यक्रम होणार असून त्याच दिवशी रात्री नऊ वाजता बोरिवली येथील प्रबोधनकार ठाकरे नाट्यगृहात तिसरे पुष्प गुंफले जाणार आहे. 

राहुल देशपांडे हे हिंदी चित्रपट संगीतातील गाजलेली गाणी आणि इतर सांगीतिक आविष्कार अगदी आगळ्यावेगळ्या पद्धतीने सादर करतात. या सांगीतिक आविष्कारांचे विविध पैलू ते या मैफलीत सादर करतात.