भाजपने मराठी माणसांचे दोन पक्ष फोडले : जयंत पाटील
शहापुरात महाविकास आघाडीची सभा
खर्डी, ता. १७ (बातमीदार) : महाराष्ट्राच्या सर्वांगीण विकासासाठी शिवसेना व राष्ट्रवादी हे मराठी माणसांनी उभे केलेले दोन राजकीय पक्ष भाजपने तोडण्याचे काम केले, अशी टीका राष्ट्रवादी शरद पवार गटाचे नेते जयंत पाटील यांनी केले. ते शहापूरमध्ये आयोजित केलेल्या प्रचारसभेत बोलत होते. तसेच, यावेळी शहापूर तालुक्यातील पाणीटंचाई कायमची दूर करण्यासाठी भावली पाणीपुरवठा योजना दीड वर्षात पूर्ण करणार असल्याचे म्हटले.

‘बटेंगे तो कटेंगे’ हे आम्हाला मान्य नसल्याचे अजित पवार सांगतात. मग भाजपसोबत का गेले हे महाराष्ट्राला माहिती आहे. कोणताही वैचारिक भाव पाहून अजित पवार भाजपसोबत गेलेले नाहीत, असेही जयंत पाटील यांनी म्हटले. उद्धव ठाकरे यांच्या सरकारचे काम स्वच्छ होते. कोरोनाच्या काळात त्यांनी केलेल्या कामाची जगभरात दखल घेतली गेली; परंतु दुर्दैवाने काही आमदार फोडले गेले व स्वच्छ प्रशासन असलेले सरकार भाजपने पाडल्याचा आरोपही जयंत पाटील यांनी यावेळी केला. महायुतीच्या सरकारने श्रीमंताच्या खरेदीवर कमी जीएसटी व शेतकऱ्यांच्या अवजार खरेदीवर जास्त जीएसटी लावण्याचे काम केले असल्याचे सांगितले. यावेळी खासदार सुरेश म्हात्रे, राष्ट्रवादीचे मुख्य प्रवर्तक महेश तपासे, विद्याताई वेखंडे, अविनाश थोरात, रूपाली कराळे, शिवसेना ठाकरे गटाचे विश्वास थळे, शंकर खाडे, बाळा धानके, विजय भगत, मधुकर पाटील, अनिल निचिते, सुमित म्हात्रे, रश्मीताई निमसे, देवेंद्र भेरे आदी उपस्थित होते.