अपक्ष उमेदवार मागणार
सर्वोच्च न्यायालयात दाद
चेंबूर, ता. १७ (बातमीदार) ः चेंबूर विधानसभा मतदारसंघातील अपक्ष उमेदवार आशीष गडकरी यांनी उमेदवारी अर्ज दाखल केला होता; मात्र त्यांच्या अर्जावर प्रस्तावकाची सही नसल्याच्या कारणावरून निवडणूक अधिकाऱ्यांनी उमेदवारी अर्ज बाद केला होता. याबाबत उच्च न्यायालयात त्यांनी याचिका दाखल केली होती; मात्र न्यायालयाने त्यांची याचिका फेटाळली असल्याने सर्वोच्च न्यायालयात दाद मागण्याचा निर्णय त्‍यांनी घेतला आहे.
चेंबूर विधानसभा मतदारसंघातील अपक्ष उमेदवार आशीष गडकरी यांनी चेंबूर नाका येथील निवडणूक कार्यालयात अपक्ष उमेदवारीचा अर्ज भरला होता. अर्जातील त्रुटी दुरुस्त करण्याची संधी निवडणूक आयोगाच्या अधिकाऱ्यांनी दिली नाही, असा आरोप गडकरी यांनी केला. न्यायमूर्ती आरिफ डॉक्टर, न्यायमूर्ती सोमशेखर सुंदरसेन यांच्या खंडपीठाने त्यांची याचिका फेटाळली. अर्जातील त्रुटी दुरुस्त करण्याकरिता वेळ दिला नाही, त्यामुळे मला निवडणुकीला मुकावे लागत असल्याचा आरोप आशीष गडकरी यांनी केला आहे.