ठाणे थोडक्यात
कल्याण पूर्वमध्ये मतदान जनजागृतीसाठी बाईक रॅली
कल्याण, ता. १७ (वार्ताहर) : मतदार जनजागृतीसाठी स्वीप कार्यक्रमाची अंमलबजावणी ठिकठिकाणी होत आहे. शनिवारी कल्याण पूर्वचे निवडणूक निर्णय अधिकारी रमेश मिसाळ आणि सहाय्यक निवडणूक निर्णय अधिकारी डॉ. स्वाती घोंगडे यांच्या मार्गदर्शनाखाली स्वीप पथकातील महापालिकेचे शिक्षणाधिकारी तथा नोडल अधिकारी विजय सरकटे यांनी कल्याण पूर्व विधानसभा मतदारसंघात ज्या प्रभागात कमी मतदान झाले आहे त्या मतदारसंघ परिसरात बाईक रॅलीचे आयोजन केले होते. जे.सी.एस. स्कूलच्या विद्यार्थ्यांनी भाल परिसरात रॅलीचे मोठ्या उत्साहात स्वागत केले. तसेच, हाजी मलंग बस स्टॉप येथे नागरिकांना मतदान जनजागृती शपथ दिली. तसेच, त्या ठिकाणी नागरिकांची मानवी साखळी तयार करून मतदान जनजागृती केली. त्यानंतर मानेरे गाव येथील जिल्हा परिषद या शाळेजवळ विद्यार्थ्यांनी रॅलीचे मोठ्या प्रमाणात घोषणा देऊन स्वागत केले. यासमयी विविध शाळांतील शिक्षक वर्ग, आरएसपीचे कर्मचारी वर्ग, कल्याण जनजागृती टीम व मैत्री फाउंडेशनचे सभासद तसेच स्वीप टीमचे कर्मचारी विलास नंदनवार, सर्जेश वेलेकर, समाधान मोरे, रवींद्र तवर, भारती डगळे, प्रणव देसाई, सिनेअभिनेता सुशील राठोड, तुळशीराम झोपे, शिरीष म्हात्रे आदी उपस्थित होते.
.................