जागोजागी प्रचाराच्या बॅनरचे ढीग
पालिकेला जागेची कमतरता

सकाळ वृत्तसेवा
डोंबिवली, ता. १७ : विधानसभा निवडणुकीच्या प्रचारात राजकीय पक्ष उमेदवाराचा प्रचार समाजमाध्यम, तसेच बॅनरच्या माध्यमातून मोठ्या प्रमाणात करत आहेत. कल्याण-डोंबिवली महापालिका क्षेत्रात कल्याण पूर्व, कल्याण पश्चिम व कल्याण ग्रामीणमध्ये याचे प्रमाण जास्त आहे. या बेकायदा बॅनरवर पालिका प्रशासनाकडून कारवाई करण्यात येत आहे, तसेच हजारो बॅनर उतरविण्यात येत असले तरी बॅनर ठेवायचे कुठे, हा प्रश्न निर्माण होत आहे. पालिकेला यासाठी जागेची कमतरता जाणवत आहे.

विधानसभा निवडणुकीच्या प्रचाराचे प्रचारासाठी आता अवघे दोन दिवस शिल्लक राहिले आहेत. प्रभागांमध्ये रॅली काढून जनसामान्यांपर्यंत पोहोचण्याचा प्रयत्न उमेदवार शेवटच्या टप्प्यात करत आहेत. विधानसभा निवडणुकीत राजकीय पक्षांकडून आपले उमेदवार जाहीर होतात, पक्षांच्या माध्यमातून या उमेदवारांच्या प्रचारासाठी मोठ्या प्रमाणात विधानसभा क्षेत्रात बॅनरबाजी केली आहे. आतापर्यंत केलेली विकासकामे आणि पुढचे व्हिजन या बॅनरच्या माध्यमातून झळकावले आहे, तसेच प्रभागातील गल्लोगल्ली रस्त्यांवर छोटे-छोटे बॅनर लावत आपल्या उमेदवाराचा चेहरा आणि पक्षाची घोषवाक्ये झळकावण्यात आली आहेत. राजकीय पक्षांच्या बड्या नेत्यांच्या सभादेखील शहरांमध्ये होत आहेत. यानिमित्तानेदेखील छोट्या छोट्या बॅनर्स व राजकीय पक्षांचे झेंडे मोठ्या प्रमाणात झळकविण्यात येतात.

विभागीय कार्यालयांच्या आवारात कचरा
बेकायदा बॅनर्सवर पालिका प्रशासनाकडून दररोज कारवाई केली जात आहे. शेकडो बॅनर्स पालिका प्रशासनाने कारवाई करत उतरवले आहेत. हे कारवाई केलेले बॅनर पालिकेच्या विभागीय कार्यालयांच्या आवारात आणून टाकण्यात येत आहेत. यामुळे त्या ठिकाणी या बॅनर्सचा ढीग तयार झाला आहे. जागेची कमतरता पालिकेला भेडसावत असल्याचे चित्र दिसून येते.