डिलीट मतांचा उमेदवारांना बसणार फटका
भिवंडी, ता. १९ (बातमीदार) : लोकसभा निवडणुकीत अनेक मतदारांच्या नावासमोर डिलीट लिहिल्याने त्यांना मतदान करता आले नाही. त्यामुळे हजारो मतदारांनी मतदान केले नाही; मात्र याबाबत स्थानिक राजकीय पक्षांच्या कार्यकर्त्यांमध्ये जागृती नसल्याने विधानसभा निवडणुकीतही उमेदवारांना याचा फटका बसणार आहे.

निवडणूक आयोगाने आपल्या राष्ट्रीय कामात जोडलेल्या सुशिक्षित अधिकारी आणि कर्मचाऱ्यांनी योग्य कामे वेळीच केली नाहीत. त्यामुळे मागील लोकसभा निवडणुकीत अनेक मतदारांना आपल्या नावापुढे डिलीट लिहिल्यामुळे मतदान करता आले नाही. याप्रकरणी वर्तमानपत्रात बातम्यादेखील प्रसिद्ध झाल्या होत्या; मात्र तत्कालीन निवडणूक कार्यालयाने मतदार नोंदणी करणाऱ्या बीएलओंची कोणतीही चौकशी करून त्यांच्यावर कारवाई केलेली नाही.

अथवा मतदारांनीदेखील आपली नावे बीएलओ यांनी मतदार यादीत का नोंद केली नाहीत, अशा तक्रारीदेखील केल्या नाहीत. दरम्यान, अशा मतदाराने आपली नावे मतदार यादीत तपासून ती दुरुस्त केल्यास त्यांना मतदानाचा अधिकार मिळणार आहे. वास्तविक राजकीय पक्षाच्या कार्यकर्त्याने याबाबत पुढाकार घेऊन मतदारांना मदत केली पाहिजे, अशी अपेक्षा असताना अनेक राजकीय कार्यकर्त्यांना मतदार यादीतील डिलीट नावाची माहिती नसल्याचे सांगून कानावर हात ठेवला आहे. मागील विधानसभा निवडणुकीत काही उमेदवार अल्पमतांनी पराभूत झाल्याची उदाहरणे आहेत. त्यामुळे अशा घटना पुन्हा घडण्याची शक्यता नाकारता येत नाही.

प्रत्येक मतदारसंघाच्या कार्यालयात मतदार नोंदणी व दुरुस्तीसाठी आवाहन केले जाते. तसेच, मतदार यादी जाहीर केल्यानंतर त्यामध्ये नावनोंदणी झाल्याची खात्री करून घेण्याचे आवाहन मतदारांना करण्यात येते. त्यामुळे मतदारांनी जागृत राहून मतदार यादी नेहमी तपासली पाहिजे.
- उदय किसवे, निवडणूक निर्णय अधिकारी, भिवंडी पश्चिम