विकास महाविद्यालयात मतदान जनजागृती
घाटकोपर, ता. १९ (बातमीदार) ः विधानसभा निवडणुकीत नागरिकांनी बहुसंख्येने आपला मतदानाचा हक्क बजावावा, यासाठी पंचक्रोशीतील नागरिकांमध्ये व आजच्या तरुण वर्गात मतदानाबाबत जनजागृती निर्माण व्हावी, या उद्देशाने विक्रोळी येथील विकास कला, विज्ञान व वाणिज्य महविद्यालयाच्या एनएसएस युनिटतर्फे मतदान जनजागृती फेरी आणि मतदान शपथ या विशेष उपक्रमाचे आयोजन केले होते.
एनएसएस युनिटमधील विद्यार्थी आपले सामाजिक दायित्व म्हणून मतदान केंद्रांवर विविध प्रकारे मदत करतात. राष्ट्रनिर्माणासाठी मतदान करा, तुमचे मत, तुमचा आवाज, उज्‍ज्वल भविष्यासाठी, आजच मतदान करा, आदी जनजागृतीपर संदेशफलक हाती घेऊन विद्यार्थ्यांनी जनजागृती फेरी काढली. विकास महाविद्यालयातून ही फेरी निघाली व कन्नमवारनगर परिसरातून मार्गस्थ होऊन महविद्यालयात परत दाखल झाली. विविध घोषणा देत नागरिकांचे लक्ष वेधून घेतले. या फेरीमध्ये १५६ विक्रोळी विधानसभा मतदारसंघातील निवडणूक आयोगाचे अधिकारीसुद्धा होते. ६३ स्वयंसेवक विद्यार्थ्यांनी या उपक्रमामध्ये सहभाग घेतला.
संस्थेचे सचिव डॉ. विनय प. राऊत, महाविद्यालयाचे प्राचार्य डॉ. आर. के. पात्रा, एनएसएस युनिट कार्यक्रम अधिकारी प्रा. विनायक मुळे यांच्या मार्गदर्शनाखाली या उपक्रमाचे आयोजन करण्यात आले.