‘निसान’च्या ९,०४० वाहनांची नोव्हेंबरमध्ये विक्री
देशांतर्गत बाजारपेठेत ओलांडला पाच लाखांचा टप्पा
गुरुग्राम, ता. ३ : ‘निसान मोटर’ने देशांतर्गत एकूण पाच लाख मोटर विक्रीचा ऐतिहासिक टप्पा ओलांडला असून, कंपनीच्या भारतातील विक्रीस सुरुवात झाल्यापासून आजवर तब्बल ५,१३,२४१ वाहनांची विक्री झाल्याची माहिती ‘निसान मोटर, इंडिया’कडून देण्यात आली. सोबतच ‘न्यू निसान मॅग्नाइट एसयूव्ही’सह अन्य वाहनांच्या मागणीत वाढ होत असून कंपनीने नोव्हेंबरमध्ये एकूण ९,०४० वाहनांची घाऊक विक्री नोंदवली आहे. यामध्ये देशांतर्गत विक्री २,३४२ नोंदवली तर ६,६९८ वाहनांची निर्यात नोंदवण्यात आली आहे.

निसान मोटर इंडियाचे व्यवस्थापकीय संचालक सौरभ वत्स यांनी या वेळी सांगितले की, निसान मोटर इंडियाने देशांतर्गत विक्रीचा पाच लाखांचा ऐतिहासिक टप्पा पार करणे, ही सर्वांसाठी अत्यंत अभिमानाची गोष्ट आहे. आमच्या ग्राहकांनी वर्षानुवर्षे आमच्या वाहनांच्या दर्जा, विश्वासार्हता आणि कार्यक्षमतेवर सातत्याने विश्वास ठेवल्याचे या उल्लेखनीय यशातून दिसून येते. निसान भारतातील कार्यपद्धती, डिलर, भागीदार आणि ग्राहकांप्रति कटिबद्ध आहे. या वर्षीच्या सुरुवातीस निसान एक्स-ट्रेल आणि न्यू निसान मॅग्नाइट या दोन वाहनांच्या योजना आम्ही जाहीर केल्या होत्या. त्या योजना लवकरच प्रत्यक्षात येतील. ते पुढे म्हणाले की, निसानच्या भारतीय बाजारपेठेशी असलेल्या दृढ संबंधांचा एक भाग म्हणून ग्राहकांच्या अधिकाधिक मागण्यांची पूर्तता करण्यासाठी आम्ही न्यू निसान मॅग्नाइट सादर करून आम्ही अलीकडेच आमच्या उत्पादनांचा विस्तार केला आहे. त्यामागे ‘वन कार, वन वर्ल्ड’ हे आमचे तत्त्वज्ञान आहे. न्यू निसान मॅग्नाइटच्या आगमनाने आमच्या निर्यातीत अभूतपूर्व वाढ झाली असून, आमच्या उत्पादन क्षमतेचे दर्शन त्यातून घडते. यामुळेच आम्ही जागतिक दर्जाची उत्पादने जगभरात पोहोचवू शकतो, असेही वत्स यांनी पुढे सांगितले.

..
प्रत्यक्ष आणि अप्रत्यक्ष रोजगार व कौशल्याच्या संधी
निसान मोटर इंडिया प्रायव्हेट लिमिटेड (एनएमआयपीएल) ही कंपनी २०१० मध्ये स्थापन झाली असून, ती निसान मोटर को. लि. जपानची १०० टक्के उपकंपनी आहे. ही कंपनी चेन्नईमधील उत्पादन प्रकल्प आणि संशोधन व विकास (आर अँड डी) केंद्रासह देशांतर्गत आणि देशाबाहेरील बाजारपेठांना सेवा देते. निसानने आपल्या जागतिक भादीदार असलेल्या रेनॉल्ट कंपनीशी ७०,००० पेक्षा अधिक प्रत्यक्ष आणि अप्रत्यक्ष रोजगार व कौशल्याच्या संधी उपलब्ध करून दिल्या आहेत. त्याचप्रमाणे भारतीय बाजारपेठेत १.८ अब्ज डॉलरची गुंतवणूक केली आहे.