किन्हवली (बातमीदार) : परटोली गावातील एका बागेला काही व्यक्तींनी आग लावल्याने सोनचाफा, आंब्याची झाडे जळून खाक झाली आहेत. मुरबाडमध्ये शिक्षक असणारे जयवंत किसन ढमके यांच्या परटोली येथील सर्व्हे क्रमांक २२९ मधील फार्महाउसमध्ये ३० आंब्याच्या व ९० सोनचाफ्याच्या झाडांचे संगोपन करण्यात आले होते; मात्र शनिवारी (ता. ७) दुपारी दोनच्या सुमारास काही व्यक्तींनी आग लावल्याने ही फुललेली बाग आगीच्या भक्ष्यस्थानी पडली. या घटनेची माहिती मिळताच ढमके यांनी आसपासच्या लोकांना बोलावून आग विझविण्याचा प्रयत्न केला; मात्र तोपर्यंत बागेचे मोठे नुकसान झाले होते. ढमके यांनी किन्हवली पोलिसांकडे तक्रार केली असून सीसीटीव्हीचे चित्रीकरणही पोलिसांना दिले आहे.