वाशी, ता. ११ (वार्ताहर) : वाहन परवाना काढण्यासाठी आवश्यक असलेल्या संकेतस्थळाचे सर्व्हर मागील तीन दिवस डाऊन असल्यामुळे अनेकांची कामे रखडली आहेत. अनेक वाहनधारकांना आपल्या कागदपत्रांसाठी तासनतास नवी मुंबई आरटीओ कार्यालयात घालवावे लागत असल्याने त्यांना मनस्ताप सहन करावा लागत आहे.
नवीन वाहन परवाना, परवान्याचे नूतनीकरण, परवान्यावरील पत्ता बदलणे इत्यादी कामांसाठी वाहनधारक परिवहन कार्यालयाला जात असतात. आरटीओकडून मिळणाऱ्या या सेवा नागरिकांना ऑनलाइन पद्धतीने पुरविल्या जातात; परंतु सोमवारपासून (ता. ९) राष्ट्रीय सूचना केंद्राच्या (एनआयसी) सर्व्हरमध्ये बिघाड झाल्यामुळे वाहनधारकांना मोठ्या गैरसोयींचा सामना करावा लागत आहे. नेरूळ येथील नवी मुंबईतील उपप्रादेशिक परिवहन कार्यालयात सोमवारपासून लागोपाठ तीन दिवस वाहनधारकांची गर्दी पाहायला मिळत आहे. सर्व्हर सुरू नसल्याने अनेकांची कामे रखडली आहेत. सर्व्हर डाऊनचा फटका आरटीओच्या कामकाजालादेखील बसला असून, दररोज मोठे नुकसान सहन करावे लागत आहे. सर्व्हर सुरू होण्याबाबत आरटीओ अधिकाऱ्यांनाही कल्पना नसल्याने वाहनधारकांना तारीख पे तारीख दिली जात आहे. याबाबत नवी मुंबई उपप्रादेशिक परिवनहच्या अधिकारी हेमांगिनी पाटील यांच्याशी संपर्क साधला असता तो होऊ शकला नाही.
-----------
मी रिक्षाचालक आहे. मागील तीन दिवसांपासून नेरूळच्या आरटीओ कार्यालयात चकरा मारतो आहे. गेल्या तीन दिवसांपासून सर्व्हर बंद असल्याने ‘उद्या या’ हेच कारण अधिकाऱ्यांकडून ऐकायला मिळत आहेत. यामुळे मनस्ताप सहन करावा लागत असून, दररोज कामधंदा बुडत असल्याने आर्थिक नुकसान होत आहे.
- सिद्धार्थ गुळूंबे, रिक्षाचालक