जव्हारमध्ये लोकराजा यशवंतराव मार्तंडराव मुकणे यांना अभिवादन

जव्हार, ता. ११ (बातमीदार) : फ्लाईंग लेफ्टनंट यशवंतराव मार्तंडराव मुकणे यांची १०७ वी जयंती बुधवारी (ता. ११) जव्हार शहरात ठिकठिकाणी साजरी करण्यात आली. या वेळी विविध पक्षांचे आजी, माजी पदाधिकारी, सर्वपक्षीय पुढारी, कार्यकर्ते, प्रशासकीय अधिकारी, कर्मचारी, महिला मोठ्या संख्येने उपस्थित होते. महाराजांनी आपल्या दूरदृष्टीने जव्हार शहर वसवल्यानंतर सर्वच वास्तू, या देणगीच्या रूपात मदत करून संस्थानकालीन शहर उदयास आणले होते. त्यांचे हे कार्य येथील जनतेला पालकत्वाची जाणीव करून देते आणि देत राहणार असल्याची भावना या वेळी मान्यवरांनी व्यक्त केली.
आदिवासी भागाचा विकास करावयाचा असल्यास आदिवासी जिल्ह्याची निर्मिती करून तो भाग रेल्वेने जोडला तरच विकास होईल, अशी लोकसभेत प्रथम मागणी यशवंतराव मार्तंडराव मुकणे यांनीच केली होती. या घटनेचेही या वेळी स्मरण करण्यात आले. त्यांनी स्वातंत्र संग्रामास वेळोवेळी छुपा पाठिंबा व मदत केली, तर पुण्याच्या फर्ग्युसन कॉलेजच्या इमारतीच्या उभारणीसाठी १९४० साली पाच हजारांची मदतही केली होती. त्यामुळे शैक्षणिक चळवळींना चालना मिळाल्याचे मत मान्यवरांनी व्यक्त केले.
मुकणे राजघराण्याच्या वैभवशाली इतिहासात जव्हार राज्य अहमदनगर ते ठाणे जिल्ह्यातील शहापूर भिवंडी ते पश्चिमेकडे वसई बंदर, तर उत्तरेकडे दिव-दमणपर्यंत विस्तारित होते. विविध नवीन उदयोतित भोसले, पेशवे, इंग्रज राजवटीत कालांतराने ते कमी कमी होत गेले. अशा कर्तव्यदक्ष राजे यशंवतराव मुकणे महाराज यांचे स्मरण करीत आठवणींना उजाळा देत नागरिकांनी जयंतीदिनी शुभेच्छा देत राजेंना अभिवादन करण्यात आले.