सकाळ वृत्तसेवा
ठाणे, ता.११ : काँग्रेसचे माजी नगरसेवक मनोज शिंदे यांनी काँग्रेसला सोडचिठ्ठी देत शिवसेना शिंदे गटात प्रवेश करत असल्याचे जाहीर केले होते. अखेर बुधवारी (ता.११)उपमुख्यमंत्री एकनाथ शिंदे यांच्या उपस्थितीत ठाण्यातील निवासस्थानी मनोज शिंदे यांनी प्रवेश केला.
ठाणे महापालिकेतील काँग्रेसचे माजी नगरसेवक मनोज शिंदे पाच वेळा नगरसेवक म्हणून निवडून आले होते. काँग्रेसचे ठाणे शहराध्यक्षही होते. विधानसभा निवडणुकीत महाविकास आघाडीच्या जागा वाटपात कोकण पट्ट्यात काँग्रेस पक्षाला जागा दिल्या नसल्यामुळे मनोज शिंदे यांनी उघडपणे नाराजी व्यक्त केली. त्यानंतर कोपरी-पाचपाखाडी मतदार संघामधून बंडखोरी करीत त्यांनी तत्कालीन मुख्यमंत्री एकनाथ शिंदे यांच्याविरोधात अपक्ष निवडणूक लढविली. या बंडखोरीमुळे ठाकरे गटाचे उमेदवार केदार दिघे यांचे मताधिक्य कमी होईल, असा अंदाज वर्तविला जात होता. प्रत्यक्षात मात्र मनोज शिंदे यांना के‌वळ १ हजार ६५३ इतकीच मते मिळाली होती. दरम्यान, मनोज शिंदे यांनी जन्मदिनाचे औचित्यसाधत शिवसेनेत प्रवेश करणार असल्याचे जाहीर केले होते. त्यानंतर उपमुख्यमंत्री एकनाथ शिंदे यांच्या उपस्थितीत त्यांच्या ठाण्यातील निवासस्थानी अधिकृतरीत्या प्रवेश केला.