रेल्वे वर्कशॉपमध्ये डब्याला आग
मुंबई : लोअर परळ येथील पश्चिम रेल्वेच्या वर्कशॉपमध्ये गुरुवारी सायंकाळी पावणेसात वाजता एका रेल्वे डब्याला अचानक आग लागली. घटनेची माहिती मिळताच अग्निशामक दलाने घटनास्थळी तत्काळ धाव घेतली आणि आगीवर युद्धपातळीवर नियंत्रण मिळवले. सुदैवाने या आगीत कोणतीही जीवितहानी झालेली नाही, तसेच हा वर्कशॉप डिपो मेंटेनन्ससाठी वापरला जात असल्याने रेल्वे मार्गावरही या घटनेचा कोणताही परिणाम झालेला नाही. आग नेमकी कशामुळे लागली याची चौकशी सुरू असून, वर्कशॉपमधील सुरक्षा उपायांबाबतही पुनर्विचार होण्याची शक्यता आहे. रेल्वे प्रशासनाकडून घटनेच्या सविस्तर चौकशीचे आदेश देण्यात आले आहेत.