मुंबई, ता. ७ : वाहतूक नियमांचे उल्लंघन करणाऱ्यांवर कारवाई केली जाते; परंतु अनेकदा वाहतूक पोलिस तडजोड करीत दंडाशिवाय रोख रक्कम घेऊन वाहनधारकांना सोडून देतात. असाच एक व्हिडिओ मुंबई पोलिसांच्या एक्स अकाउंटवर व्हायरल झाला असून, संबंधित लोकेशन शेअर करण्याची मागणी वाहतूक पोलिसांनी केली आहे. पण कोणताही माहिती अकाउंटवरून शेअर करण्यात आली नसल्याने हा विषय चर्चेचा झाला आहे.
वाहतूक नियमांचे उल्लंघन केल्याबद्दल एका झोमॅटोवाल्याच्या  गाडीचा फोटो वाहतूक पोलिसाने  काढला. हा फोटो काढल्यानंतर काही अंतरावर दुचाकीस्वाराने दुचाकी उभी केली तसेच खिशातून पैसे काढत वाहतूक पोलिसांकडे गेला. त्यानंतर वाहतूक पोलिसाने पैसे खिशात घातले, तर दुचाकीचालक निघून गेल्याचा व्हिडिओ व्हायरल झाला आहे. मुंबईतील कोणत्या भागातील हा व्हिडीओ आहे, याबाबतची माहिती अद्याप उघड झालेली नाही. त्यामुळे पोलिसांकडून त्याची शहानिशा केली जात आहे. तसेच व्हिडिओ शेअर करणाऱ्याला संबंधित ठिकाणची माहिती देण्याचे आवाहन करण्यात आले आहे.