म्हसोबाच्या यात्रेची तयारी पूर्ण

मुरबाड, ता. ११ (बातमीदार) ः जिल्ह्यातील ग्रामीण भागातील सर्वात मोठी व गुरांच्या बाजारासाठी महाराष्ट्र राज्यात प्रसिद्ध असलेली म्हसोबाची यात्रा पौष शुद्ध पौर्णिमा सोमवारी (ता. १३) सुरू होणार आहे. देवस्थान समितीतर्फे यात्रेकरूंसाठी विविध सोयी-सुविधा देण्याचे काम सुरू आहे. म्हसा ग्रामपंचायतीतर्फे यात्रेकरूंना पिण्याचे पाणी, शौचालय, परिसर स्वच्छता अशी विविध कामे सुरू आहेत, अशी माहिती म्हसा ग्रामपंचायतीच्या सरपंच जया घागस यांनी दिली.

यात्राकाळात तात्पुरती दुकाने उभारण्याचे काम सुरू आहे. मिठाई, खेळणी शेतकऱ्यांना आवश्यक असणाऱ्या वस्तू, अवजारांची दुकाने, घोंगडी, ब्लॅंकेट, तसेच मनोरंजनासाठी विविध प्रकारची खेळणी, पाळणे म्हसा गावात आलेली आहेत. ही यात्रा सुमारे पंधरा दिवसांपर्यंत चालणार आहे, अशी माहिती श्री खांबलिंगेश्र्वर म्हसोबा देवस्थान समितीचे अध्यक्ष दशरथ पष्टे यांनी दिली. यात्राकाळात परिसरावर लक्ष ठेवण्यासाठी देवस्थानतर्फे पोलिसांना एक ड्रोन कॅमेरा दिल्याचे पष्टे यांनी सांगितले.

२५० वर्षांची परंपरा असलेल्या म्हसा यात्रेत सर्वांसाठी सर्व काही उपलब्ध आहे. हौसे, गवशे, नवशे असे सर्व प्रकारचे लाखो यात्रेकरू येथे येतात. मुरबाड-कर्जत राष्ट्रीय महामार्गावर मुरबाडपासून बारा किलोमीटर अंतरावर म्हसा हे गाव आहे. या ठिकाणी खांबलिंगेश्र्वर ऊर्फ म्हसोबा हे देवस्थान आहे. ठाणे जिल्हा परिषदेकडून येथे गुरांच्या व यात्रेकरूंच्या सोईसाठी वैद्यकीय यंत्रणा उभारली जाते.

म्हसा येथील खांबलिंगेश्वराच्या जत्रेत कोट्यवधी रुपयांची उलाढाल होत असते. ठाणे, नगर, पुणे, रायगड आणि नाशिक जिल्ह्यांमधून भक्त आणि व्यापारी जत्रेसाठी येतात. त्यात पाळीव जनावरांच्या खरेदी-विक्रीचे म्हसा हे मोठे केंद्र आहे. देशातील जातीवंत खिल्लारी, देशी, गाय, बैलांची विक्री यात्रेचे प्रमुख आकर्षण असते. त्यासोबत कृषीउपयोगी अवजारे, साहित्य, घोंगड्या, सतरंज्या अशी अनेक दुकाने जत्रेत असतात. दहा दिवस चालणाऱ्या या जत्रेत कोट्यवधी रुपयांची उलाढाल होत असते. ग्रामीण भागातील शेतकरी व आदिवासीबांधवांसाठी ही जत्रा महत्त्वाची आहे.

तीन महिने आधीपासून तयारी
म्हसा यात्रेचा ठाणे, रायगड, पुणे व नगर जिल्ह्यातील ग्रामीण भागातील अर्थव्यवस्थेवर सकारात्मक परिणाम होतो. यात्रा पंधरा दिवस भरत असली तरी किमान दोन-तीन महिने आधीपासून यात्रेची तयारी सुरू असते. यात्रेत विक्रीसाठी नेण्यात येणाऱ्या गुरांना व्यवस्थित चारा-पाणी घालून त्यांना तयार करणे, बांबूच्या टोपल्या, चाप, सुपे आदी वस्तू तयार करण्यात ग्रामीण भागातील कारागीर व्यस्त असतात. गुरांच्या बाजाराजवळ गुरांना सजविण्यासाठी लागणाऱ्या वस्तूंची दुकाने असतात. या बाजारातसुद्धा लाखो रुपयांची विक्री होते.

एक कोटीपेक्षा जास्त विक्री
यात्रेचा सर्वात जास्त फायदा मिठाई विकणाऱ्या व्यापाऱ्यांना होतो. म्हसोबा मंदिराशेजारी मांडव टाकून मिठाई विक्री करणारे व्यापारी येथे पिढ्यान् पिढ्या व्यवसाय करतात. दरवर्षी सुमारे दहा हजार किलो जांभूळ, हतोली, खाजा ही मिठाई विक्री होते. मिठाई व्यापाऱ्यांच्या दुकानात मिठाई तयार करण्याचे काम सुरू झाले आहे. यात्राकाळात दहा ते बारा माणसे चोवीस तास काम करीत असतात. भाविक दुकानातून मोठ्या प्रमाणावर मिठाई खरेदी करतात, त्यामुळे मिठाई बाजारात सुमारे एक कोटीपेक्षा जास्त किमतीची मिठाई विकली जाते.

विशेष बस गाड्या
म्हसा यात्रा एसटी महामंडळाला कमाईचे मोठे साधन ठरते. मुरबाड, कल्याण, नेरळ व कर्जत येथून म्हसोबा यात्रेसाठी विशेष बस गाड्या सोडण्यात येणार आहेत. म्हसा ग्रामपंचायतीतर्फे यात्रेकरूंना पिण्याचे पाणी, शौचालय, स्वच्छता अशा मूलभूत सोयी उपलब्ध करून दिल्याचे ग्रामविकास अधिकारी शिवाजी टोहके यांनी सांगितले.

मुरबाड : म्हसोबाच्या यात्रेत यात्रेकरूंच्या मनोरंजनासाठी विविध प्रकारचे आकाश पाळणे, मौत का कुवा अशी साधने दाखल झाली आहेत.