डोंबिवलीत पुस्तक आदान-प्रदान सोहळा
मंत्री उदय सामंत यांच्या हस्ते उद्घाटन
सकाळ वृत्तसेवा
डोंबिवली, ता. १८ : पै फ्रेंड्स लायब्ररी आणि कल्याण-डोंबिवली महापालिकेच्या संयुक्त विद्यमाने डोंबिवलीत पुस्तक आदान-प्रदान सोहळ्याचे आयोजन केले आहे. या कार्यक्रमाचे उद्घाटन मराठी भाषा संवर्धन मंत्री उदय सामंत आणि आमदार रवींद्र चव्हाण यांच्या हस्ते झाले. या वेळी मंत्री सामंत यांनी मराठी भाषा आणि संस्कृती जपण्यासाठी पै फ्रेंड्स लायब्ररीच्या योगदानाचे विशेष कौतुक केले.

डोंबिवलीत पुस्तक आदान-प्रदान सोहळ्याचे आयोजन डोंबिवलीतील सावळाराम क्रीडा संकुल येथे केले आहे. या उपक्रमाला मराठी भाषा संवर्धन मंत्री उदय सामंत आणि आमदार रवींद्र चव्हाण यांची प्रमुख उपस्थिती लाभली. मंत्री सामंत यांनी डोंबिवलीतील नावीन्यपूर्ण उपक्रमांचे कौतुक करत सांगितले की, “मराठी भाषेच्या संवर्धनासाठी आणि प्रसारासाठी पुस्तक आदान-प्रदान हा उपक्रम महाराष्ट्रभर पोहोचविणे आवश्यक आहे. विश्व मराठी साहित्य संमेलनाच्या माध्यमातून या उपक्रमाला नवा आयाम देता येईल.”

मराठी भाषेच्या भविष्यासाठी सकारात्मक पावले उचलण्याचे आश्वासन देताना मंत्री सामंत यांनी सांगितले की, पंतप्रधान नरेंद्र मोदी यांनी मराठी भाषेला अभिजात दर्जा दिल्यामुळे मराठीच्या प्रगतीसाठी केंद्र सरकारकडून आवश्यक निधी उपलब्ध होणार आहे, तसेच मराठी भाषेला जागतिक स्तरावर प्रथम स्थान मिळवून देण्यासाठी प्रयत्न सुरू आहेत. मराठी शाळांच्या घटत्या पटसंख्येबाबत विचार मांडताना मंत्री सामंत म्हणाले की, खासगी शाळांच्या धर्तीवर जिल्हा परिषदेच्या शाळा विकसित केल्यास मराठी शाळांमध्ये विद्यार्थीसंख्या वाढू शकते. इंग्रजी माध्यमाच्या शाळा सोडून मराठी शाळांमध्ये प्रवेश घेण्यासाठी रांगा लागल्याची उदाहरणे समोर येत आहेत. या मॉडेलचा अवलंब करून राज्यभर मराठी शाळांचा विकास होणे गरजेचे आहे.”