वसई, ता. १८ (बातमीदार) : रस्त्यावरून वाहने सुसाट धावत असतात. चालकांकडून अनेकदा नियमांचे उल्लंघन केले जाते. त्यामुळे पादचाऱ्यांना जीवदेखील गमवावा लागतो. दुचाकी चालवताना हेल्मेटचा वापर करणे गरजेचे आहे. यासाठी वसई वाहतूक पोलिसांनी जनजागृती मोहीम हाती घेतली होती. ‘हेल्मेट वापरा, जीव वाचवा अन्यथा यम प्राण घेऊन जाईल’, असा संदेश देण्यात आला.

वसई पश्चिमेतील वाहतूक विभाग कार्यालय ते अंबाडी नाका मार्गापर्यंत जनजागृती रॅली काढण्यात आली. या वेळी वाहतुकीच्या नियमांची माहिती वाहनचालकांना करून देण्यात आली. याचबरोबर यमाच्या रूपात आलेल्या एका व्यक्तीने हेल्मेट न घालणाऱ्यांना अडवून वाहतूक पोलिस हेल्मेट आणि गुलाब भेट देत होते. हेल्मेट का वापरावे याची माहिती देण्यात आली. या वेळी वाहतूक विभागाचे वरिष्ठ पोलिस निरीक्षक प्रशांत लांघी, उपनिरीक्षक तानाजी चौगुले यांच्यासह कर्मचारी आदी सहभाग होते.

वाहन चालवताना रस्ता वाहतुकीचे नियम हे प्रत्येक चालकाने पाळले पाहिजेत. वसईत हेल्मेट वापरणे तसेच वाहतुकीच्या कायद्याबाबत माहिती देऊन जनजागृती करण्यात आली. या वेळी अनेक जण हे विनाहेल्मेट प्रवास करीत होते. त्यांचे वाहतूक विभागाकडून प्रबोधन करण्यात आले.
- प्रशांत लांघी, वरिष्ठ पोलिस निरीक्षक, वाहतूक विभाग, वसई