भिवंडीत रुग्णवाहिकेमुळे वाहतूक कोंडी
भिवंडी (बातमीदार) : अरुंद रस्त्यामुळे शहरातील वाहनचालक आणि नागरिकांना अनेक समस्यांचा सामना करावा लागत आहे. त्यातच शहरातील रुग्णालयाजवळ रस्त्याच्या मधोमध रुग्णवाहिका उभी केल्याने वाहतूक कोंडीची घटना गैबीनगर भागात शनिवारी (ता. १५) दुपारी गर्दीच्या वेळी घडली. या घटनेमुळे नागरिकांनी संताप व्यक्त केला आहे. या वाहतूक कोंडीत स्कूल बसदेखील सापडल्याने याचा फटका शालेय विद्यार्थ्यांना बसला. शहरातील गैबीनगरमधील औलिया मशिदीजवळील नोबल रुग्णालयात शनिवारी दुपारी रुग्णवाहिका क्रमांक एमएच ०४/ जेके ९४५४ चा चालक रुग्णाला घेण्यासाठी पोहोचला. तेव्हा रुग्णवाहिका चालकाने रुग्णवाहिका रस्त्याच्या मधोमध उभी केली. त्यानंतर तो रुग्णाला घेण्यासाठी रुग्णालयात गेला. त्यामुळे रस्त्यावरील वाहतूक ठप्प होऊन तिथे वाहतूक कोंडी झाली. त्यामुळे वाहनचालकांना बराच काळ समस्यांना तोंड द्यावे लागले. या कोंडीत शाळेची बसदेखील अडकली. वाहतूक कोंडी झाल्याने वाहनांच्या लांब रांगा लागल्या.