सहा शाळांच्या एकत्रीकरणाच्या रोप्यमहोत्सवाला प्रतिसाद
माणगाव, ता. १८ (बातमीदार) ः रायगड विभागातील सहा शाळांमधील ज्ञानरचनावादी दृष्टिकोन ठेवून अध्ययन, अध्यापनात नवनवीन प्रयोग करणाऱ्या सर्व उपक्रमशील शिक्षकांचा प्रतिवर्षीप्रमाणे एकत्रीकरणाचा रौप्यमहोत्सवी मेळावा उत्‍साहात पार पडला. माध्यमिक विद्यामंदिर रातवड, अभिनव ज्ञानमंदिर उसर खुर्द, सरस्वती विद्यामंदिर वडघर मुद्रे, जय जवान जय किसान विद्यालय वाघेरी, गोळेगणी, वनवासी कल्याण आश्रमशाळा माणगाव या सहा शाळांचे मुख्याध्यापक, शिक्षक, शिक्षकेतर कर्मचारी या एकत्रीकरणात सहभागी झाले होते.
छत्रपती शिक्षण मंडळ कल्याणचे कार्याध्यक्ष श्रीकांत तरटे, कोषाध्यक्ष विश्वास सोनवणे, सरचिटणीस डॉ. नीलेश रेवगडे, पर्यावरणतज्ज्ञ‍ अभिजित देशपांडे, रातवड शाळा शालेय समिती अध्यक्ष संजय पालकर, सदस्य ललित सारंग, सामाजिक कार्यकर्ते कृष्णा महाडिक आदी मान्यवरांच्या हस्ते दीपप्रज्वलनाने या एकत्रीकरणाची सुरुवात करण्यात आली. यावेळी सुस्वर आवाजात विद्यार्थ्यांनी ईशस्तवान व स्वागतगीत सादर केले. या एकत्रीकरणात नवीन राष्ट्रीय शैक्षणिक धोरणाविषयी तज्ज्ञ‍ मार्गदर्शक उर्मिला जाधव, सदानंद जाधव यांनी मार्गदर्शन केले. नवीन शैक्षणिक धोरणाची व्याप्ती, शिक्षकांनी करावयाची तयारी या विषयावर त्यांनी मार्गदर्शन केले. पर्यावरण संरक्षण याविषयी पर्यावरणतज्ज्ञ‍ अभिजित देशपांडे यांनी मार्गदर्शन केले. पर्यावरण जतन संवर्धनात आपली भूमिका, हरित घर इत्यादीबाबत त्यांनी माहिती दिली. समारोपीय सत्रात डॉ. नीलेश रेवगडे यांनी शिक्षण क्षेत्रातील विविध आव्हाने याविषयी शिक्षकांना मार्गदर्शन केले. छत्रपती शिक्षण मंडळ कल्याण संचालित रायगड जिल्ह्यातील एकत्रीकरणाला २५ वर्षे पूर्ण झाल्याबद्दल रातवड विद्यालयाच्या वतीने रौप्यमहोत्सवी वर्ष साजरे करण्यात आले. उपस्थित सर्व मान्यवर, पदाधिकारी व शिक्षक, शिक्षकेतर कर्मचारी यांचा रौप्यमहोत्सवी सन्मानचिन्ह देऊन सन्मान करण्यात आला.