वसई, ता. १८ (बातमीदार) : सध्या वसई-विरार महापालिकेवर प्रशासकीय राजवट आहे. प्रशासकांकडून पाचवा अर्थसंकल्प सादर करण्यात येणार आहे. शहराच्या विकासाच्या दृष्टीने कोणते महत्त्वाचे निर्णय घेणार, याची उत्सुकता करदात्यांना लागली आहे. मार्चच्या पहिल्या आठवड्यात अर्थसंकल्प सादर होण्याची शक्यता आहे.

वसई-विरार महापालिकेने गेल्या वर्षी २०२३-२४ वर्षाचा सुधारित आणि २०२४-२५ या आर्थिक वर्षाचा मूळ अर्थसंकल्प सादर केला होता. एकूण तीन हजार ११२.०७ कोटी आणि १०.३३ कोटी शिलकीचा हा अर्थसंकल्प होता. यंदाच्या अर्थसंकल्पात कोणत्या बाबींना प्राधान्य दिले जाणार आहे. नवीन योजना अथवा अन्य सुविधांचा समावेश आहे का, हे स्पष्ट होणार आहे.

वसई-विरार महापालिकेने आरोग्यसेवा सक्षमीकणावर भर दिला. आरोग्य मंदिरांसह अन्य योजना आणल्या आहेत. त्यामुळे आगामी अर्थसंकल्पात वैद्यकीय सेवेसाठी आर्थिक तरतूद आणि अंमलबजावणी कोणत्या स्वरूपाची असेल, तसेच शहरात वाहतूक कोंडीची समस्या मोठ्या प्रमाणात निर्माण होत आहे. त्यामुळे नवे पर्यायी मार्ग, वाहतूक व्यवस्थेत सुधारणा याबाबत समावेश आहे का, हेदेखील समोर येणार आहे. सांडपाणी व्यवस्था, स्वछ्तेबाबत नवीन निर्णय काय असतील, हेदेखील समजणार आहे. नवीन पाणीपुरवठा योजनांची आखणी केली आहे का, याबाबत यंदाचा अर्थसंकल्प महत्त्वाचा ठरणार आहे. गेल्या आर्थिक वर्षाप्रमाणे करामध्ये दिलासा दिला होता. यंदा महापालिकेने कोणती भूमिका घेतली आहे, याबाबत अर्थसंकल्पाची पाने उलगडल्यानंतर स्पष्ट होणार आहे.