मॉर्निंग वॉकसाठी गेलेल्या व्यक्तीचा अज्ञात वाहनाच्या धडकेत मृत्यू
नवी मुंबई, ता. १९ (वार्ताहर): मॉर्निंग वॉकसाठी गेलेल्या एका व्यक्तीला अज्ञात वाहनाने धडक दिल्याने झालेल्या अपघातात त्या व्यक्तीचा मृत्यू झाल्याची दुर्घटना मंगळवारी (ता. १८) सकाळी उरणमधील नवीन शेवा गावाकडे जाणाऱ्या रोडवर घडली. उरण पोलिसांनी या दुर्घटनेतील अज्ञात वाहनचालकाविरोधात गुन्हा दाखल करून त्याचा शोध सुरू केला आहे.
या दुर्घटनेतील मृत व्यक्तीचे नाव धर्मपालसिंग सुखवासी बाल्मिकी (४९) असे असून, ते नवीन शेवा येथील तेलीपाडा गावात राहत होते. ते एका खासगी कंपनीत नोकरीस होते. धर्मपालसिंग हे दरदिवशी सकाळी मॉर्निंग वॉकसाठी जात होते. मंगळवारी सकाळी पाच वाजण्याच्या सुमारासदेखील धर्मपालसिंग मॉर्निंग वॉकसाठी गेले होते. या वेळी ते तेलीपाडा गावाच्या कमानीपासून १०० मीटर पुढे गेले असताना, त्यांच्या पाठीमागून आलेल्या भरधाव वाहनाने त्यांना धडक देऊन पलायन केले. काही वाहनचालकांनी पोलिसांना याबाबतची माहिती दिली. त्यानंतर उरण पोलिसांनी घटनास्थळी धाव घेऊन जखमी धर्मपालसिंग यांना रुग्णालयात दाखल केले; मात्र त्यापूर्वीच त्यांचा मृत्यू झाल्याचे घोषित करण्यात आले.