लोखंडी रॉडने मारहाण करून विद्यार्थिनीवर लैंगिक अत्याचार

ठाणे शहर, ता. १९ (बातमीदार) ः महाविद्यालयीन विद्यार्थिनीला अमानुष मारहाण करून तिच्यावर लैंगिक अत्याचार केल्याची घटना कोपरी पोलिस ठाण्याच्या हद्दीत घडली. पीडित तरुणीला गंभीर अवस्थेत जिल्हा सामान्य रुग्णालयात दाखल करण्यात आले असून, पोलिसांनी आरोपीला अटक केली आहे. संतन नाडार असे आरोपीचे नाव आहे.
ठाण्यातील वागळे इस्टेट येथे राहणारी २० वर्षीय तरुणी कोपरी येथील एका महाविद्यालयात शिकत आहे. यासोबतच ती डोंबिवलीत राहणाऱ्या संतन राज नाडार (वय ४५) याच्या कोपरीतील वर्कशॉपमध्ये ॲनिमेशनचे अर्धवेळ काम करते. महाविद्यालयातील मित्रांसोबत तिने बोलू नये, असा दबाव तो तिच्यावर आणत असे. तसेच ‘तुझ्या मोबाईलमधील मित्राचे फोटो तुझ्या आई-वडिलांना दाखवेन, तुझे लग्न होऊ देणार नाही,’ अशी धमकी देऊन तिला ब्लॅकमेल करत असे. कोपरीत नवे दुकान घेतले, असे सांगून त्याने तिला मंगळवारी (ता. १८) दुकानात बोलावले आणि शीतपेयात गुंगीचे औषध टाकून तिच्यावर बलात्कार केला. त्यानंतर तिला तिच्या मित्राच्या कारणावरून लोखंडी रॉडने बेदम मारहाण केली आणि पुन्हा तिच्यावर बलात्कार केला. एवढेच नाही, तर तिला थंड पाण्याने अंघोळ घालून पुरावा नष्ट करण्याचा प्रयत्न केला. याबाबत कोणाला सांगितले, तर जीवे ठार मारेन, अशी धमकी दिली. जखमी झालेल्या गंभीर अवस्थेत पीडित मुलगी घरी आली असता तिच्या आई-वडिलांनी तिला जिल्हा रुग्णालयात उपचारासाठी दाखल केले. लोखंडी रॉडने तिला मारहाण केल्यामुळे तिच्या अंगावर जखमा झाल्या असून, गंभीर अवस्थेत तिच्यावर उपचार सुरू आहेत. आरोपीला अटक केली असून, अधिक तपास सुरू असल्याचे वरिष्ठ पोलिस निरीक्षक निशिकांत विश्वकार यांनी सांगितले.