बदलापुरात पहिल्यांदाच महाराजांची महाआरती
बदलापूर, ता. १९ (बातमीदार) : उल्हास नदीच्या काठावर, छत्रपती शिवाजी महाराजांच्या अश्वारूढ पुतळ्याचे अनावरण मुख्यमंत्री देवेंद्र फडणवीस यांच्या हस्ते मंगळवारी (ता. १८) करण्यात आले. त्यानंतर शिवजयंतीनिमित्त या ठिकाणी आमदार किसन कथोरे व कुळगाव बदलापूर नगरपालिकेचे मुख्याधिकारी मारुती गायकवाड यांच्या उपस्थितीत बदलापूरकरांच्या साक्षीने पहिल्यांदाच शिवरायांची महाआरती करण्यात आली. पुढल्या वर्षी याच ठिकाणी तीनदिवशीय महाशिवजयंतीचे आयोजन करणार असल्याचे प्रतिपादन आमदार किसन कथोरे यांनी या वेळी केले.

उपस्थित मान्यवरांनी महाआरतीच्या रूपाने शिवरायांचा जागर केला. महाआरतीनंतर या ठिकाणी फटाक्यांची आतषबाजी करण्यात आली. उपस्थित बदलापूरकरांनी आमदारांच्या संकल्पनेतील या कार्यक्रमाचे जोरदार स्वागत केले. लहान मुलांच्या ‘जय भवानी, जय शिवाजी’च्या घोषणांनी वातावरण शिवमय झाले होते.

कार्यक्रमानंतर माध्यमांशी बोलताना आमदार किसन कथोरे यांनी म्हटले, की ऐतिहासिक वारसा असलेल्या बदलापूर शहराला सांस्कृतिक शहराची ओळख प्राप्त झाली आहे. या अनुषंगाने महाराष्ट्र राज्याचा इतिहास अजरामर करणाऱ्या महापुरुषांचे पुतळे उभारून शहराला एक वेगळी ओळख देत आहोत. मुख्यमंत्री देवेंद्र फडणवीस यांच्या हस्ते छत्रपती शिवाजी महाराजांच्या अश्वारूढ पुतळाचे अनावरण करण्यात आले. पुढच्या वर्षी याच ठिकाणी तीन दिवसांचा कार्यक्रम घेऊन महाशिवजयंतीचे आयोजन करण्यात येणार आहे. या महाआरती कार्यक्रमाला माजी नगरसेवक संभाजी शिंदे, शरद तेली, राजेंद्र घोरपडे, राजश्री घोरपडे आणि भाजपाचे अनेक पदाधिकारी, कार्यकर्ते उपस्थित होते.